ഇടപ്പള്ളി: പുതിയ അധ്യയന വർഷത്തോടനുബന്ധിച്ച് സ്കൂൾ കുട്ടികൾക്കായി പഠനോപകരണ വിതരണവുമായി സേവാഭാരതി ഇടപ്പള്ളി യൂണിറ്റ്. ഇടപ്പള്ളിയിലെ രണ്ട് സർക്കാർ സ്കൂളുകളിലെ വിദ്യാർത്ഥികൾക്കായാണ് സേവാഭാരതിയുടെ നേതൃത്വത്തിൽ പഠനോപകരണങ്ങളും നോട്ട്ബുക്കുകളും വിതരണം ചെയ്തത്.
ഇടപ്പള്ളി ഗവണ്മെന്റ് യു.പി. സ്കൂളിൽ നടന്ന ചടങ്ങിൽ മുൻ കുസാറ്റ് ലെക്ചററും നിലവിൽ കാലാവസ്ഥാ നിരീക്ഷണ ശാസ്ത്രജ്ഞനുമായ വേണു ജി. നായർ പഠനോപകരണങ്ങളുടെ വിതരണോദ്ഘാടനം നിർവ്വഹിച്ചു. സ്കൂൾ ഹെഡ്മിസ്ട്രസ് ലിനെറ്റ് ഫെർണാൻഡസിന്റെ സാന്നിധ്യത്തിൽ പി.ടി.എ. പ്രസിഡന്റ് അമ്പിളി പഠനോപകരണങ്ങൾ ഏറ്റുവാങ്ങി. ചടങ്ങിൽ സേവാഭാരതി കമ്മിറ്റി അംഗങ്ങളും സ്കൂളിലെ അധ്യാപക-അനധ്യാപക ജീവനക്കാരും പങ്കെടുത്തു.
ഇടപ്പള്ളി ഗവണ്മെന്റ് എൽ.പി. സ്കൂൾ വിദ്യാർത്ഥികൾക്കായുള്ള നോട്ട്ബുക്ക് വിതരണ ചടങ്ങിൽ, സ്കൂൾ ഹെഡ്മിസ്ട്രസ് ശ്രീമതി മിനി ബി.എസ്., ഇടപ്പള്ളി സേവാഭാരതി എക്സിക്യൂട്ടീവ് പ്രസിഡന്റ് ശ്രീപ്രകാശിൽ നിന്നും പഠനോപകരണങ്ങൾ സ്വീകരിച്ചു. ചടങ്ങിൽ സേവാഭാരതി സെക്രട്ടറി വേണുഗോപാൽ, മറ്റ് എക്സിക്യൂട്ടീവ് കമ്മിറ്റി അംഗങ്ങൾ, സ്കൂളിലെ അധ്യാപകർ, സ്റ്റാഫ് അംഗങ്ങൾ തുടങ്ങിയവർ സന്നിഹിതരായിരുന്നു.
