നീലംപേരൂർ: പി. എൻ. പണിക്കർ സ്മാരക വായനക്കൂട്ടത്തിന്റെ ആഭിമുഖ്യത്തിൽ ഇരുപത്തിയൊന്നാമത് പുസ്തക ചർച്ചയും വായനാദിനാചരണവും സംഘടിപ്പിച്ചു. ദേശീയ വായനാദിനമായ ഇന്ന് പി. എൻ. പണിക്കരുടെ ജന്മനാടായ നീലംപേരൂരിൽ വെച്ചായിരുന്നു പരിപാടി നടന്നത്. ചാന്നാനിക്കാട് വിവേകാനന്ദ പബ്ലിക് സ്കൂളിലെ വിദ്യാർത്ഥികളും അധ്യാപകരും പരിപാടിയിൽ പങ്കാളികളായി.
വായനക്കൂട്ടം പ്രസിഡന്റ് പി. കെ. ശ്രീകുമാർ അധ്യക്ഷത വഹിച്ച ചടങ്ങിൽ ജനറൽ സെക്രട്ടറി എ. എസ്. സതീഷ് സ്വാഗതം ആശംസിച്ചു. വിവേകാനന്ദ പബ്ലിക് സ്കൂൾ പ്രിൻസിപ്പൽ ചിത്ര എസ്. നായർ പുസ്തക ചർച്ചയുടെ ഉദ്ഘാടനം നിർവഹിച്ചു.
തുടർന്ന്, പി. എൻ. പണിക്കർ സ്മാരക വായനക്കൂട്ടം രക്ഷാധികാരിയും പഞ്ചശ്രീ കലാപീഠം ഡയറക്ടറുമായ ഈര ജി. ശശികുമാർ ‘മായൻ കടുവ’ എന്ന ബാലസാഹിത്യ നോവൽ അവതരിപ്പിച്ചു. ജന്മനാ 12 ശതമാനം മാത്രം കാഴ്ചശക്തിയുള്ള ശശി സാർ, കുടുംബാംഗങ്ങളുടെയും ശിഷ്യന്മാരുടെയും സഹായത്തോടെ പുസ്തകങ്ങൾ വായിച്ചുകേട്ടാണ് ഈ വേറിട്ട പുസ്തകാവതരണം നടത്തിയത്. കുട്ടികളുടെ ചോദ്യങ്ങൾക്കും സംശയങ്ങൾക്കും ലളിതവും സരസവുമായി അദ്ദേഹം മറുപടി നൽകിയത് ശ്രദ്ധേയമായി.
വിവേകാനന്ദ പബ്ലിക് സ്കൂളിലെ വിദ്യാർത്ഥികൾ നടത്തിയ പുസ്തകാവതരണവും കവിതാലാപനവും പരിപാടിക്ക് മാറ്റുകൂട്ടി. സ്കൂളിലെ ലിറ്റററി ക്ലബ്ബിന്റെ ഉദ്ഘാടനവും ഇതോടൊപ്പം വേദിയിൽ വെച്ച് നടന്നു. വായനക്കൂട്ടം കമ്മിറ്റി അംഗവും സേവാഭാരതി പഞ്ചായത്ത് ജനറൽ സെക്രട്ടറിയുമായ രാജേന്ദ്രകുമാർ ചടങ്ങിൽ കൃതജ്ഞത രേഖപ്പെടുത്തി.
വായനാദിനാചരണത്തിന്റെ ഭാഗമായി പരിപാടിയിൽ പങ്കെടുത്ത എല്ലാ വിദ്യാർത്ഥികൾക്കും പുസ്തകങ്ങളും വിതരണം ചെയ്തു.
