എറണാകുളം: ജാതിമത ഭേദമന്യേ ഹിന്ദു സമൂഹത്തെ ഒന്നിപ്പിക്കുക, രാജ്യത്തിന്റെ പുരോഗതിക്കായി പ്രവർത്തിക്കുക എന്നതാണ് സംഘത്തിന്റെ ലക്ഷ്യമെന്ന് ആർഎസ്എസ് ക്ഷേത്രീയ സമ്പർക്ക പ്രമുഖ് ബി. പ്രകാശ്. സംഘശതാബ്ദിയുടെ ഭാഗമായി കൊച്ചി മഹാനഗർ എറണാകുളം സീതാരാമ കല്യാണ മണ്ഡപത്തിൽ സംഘടിപ്പിച്ച പ്രബുദ്ധ പൗരസംഗമത്തിൽ “സംഘത്തിന്റെ ദാർശനിക അടിത്തറയും വളർച്ചയുടെ നാഴികക്കല്ലുകളും” എന്ന വിഷയത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം.
രാജ്യത്ത് ഏറ്റവും കൂടുതൽ ശാഖകൾ പ്രവർത്തിക്കുന്ന സംസ്ഥാനങ്ങളിൽ ഒന്നാണ് കേരളമെന്നും സംഘത്തിന്റെ അടിത്തറ ഇവിടെ ശക്തമാണെന്നും അദ്ദേഹം ചൂണ്ടിക്കാണിച്ചു. ശതാബ്ദി ആഘോഷങ്ങളുടെ ഭാഗമായി വിവിധ കർമ്മപദ്ധതികളും രാജ്യത്ത് നടപ്പിലാക്കുന്നുണ്ട്. 2047-ഓടെ ഭാരതത്തെ ലോകത്തെ മുൻനിര സാമ്പത്തിക ശക്തിയായി മാറ്റുന്നതിൽ യുവജനങ്ങളുടെ പങ്ക് നിർണായകമാണെന്നും അദ്ദേഹം പറഞ്ഞു.
അഡീഷണൽ സോളിസിറ്റർ ജനറൽ പി. ശ്രീകുമാർ അധ്യക്ഷത വഹിച്ച ചടങ്ങിൽ വിവിധ മേഖലകളിലെ പ്രമുഖർ പങ്കെടുത്തു.
Discussion about this post