കൊല്ലം: ഭിന്നശേഷിക്കാർ ആരുടെയും ദയകൊണ്ട് ജീവിക്കേണ്ടവരല്ലെന്നും മറിച്ച് നമ്മെപ്പോലെ സമൂഹത്തിൽ തലയുയർത്തിപ്പിടിച്ച് ജീവിക്കേണ്ടവരാണെന്നും ചാത്തന്നൂർ എംഎൽഎ ബി.ബി. ഗോപകുമാർ. കൊല്ലം റെഡ്ക്രോസ് ഹാളിൽ നടന്ന സക്ഷമ കൊല്ലം ജില്ലാ പ്രതിനിധി സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തങ്ങളുടെതല്ലാത്ത കാരണത്താൽ ജനിക്കുന്നവരായ ഭിന്നശേഷിക്കാരെ അതിനായി പ്രാപ്തരാക്കുക എന്നത് സമൂഹത്തിന്റെ കടമയാണെന്നും അദ്ദേഹം പറഞ്ഞു.
ജില്ലാ പ്രസിഡന്റ് അഡ്വ. അയ്യപ്പൻ പിള്ളയുടെ അധ്യക്ഷതയിൽ ചേർന്ന യോഗത്തിൽ ജില്ലാ സെക്രട്ടറി എൻ. സുബ്രഹ്മണ്യൻ സ്വാഗതവും പ്രവർത്തന റിപ്പോർട്ടും അവതരിപ്പിച്ചു. ആർഎസ്എസ് വിഭാഗ് സംഘചാലക് ഡോ. ബി.എസ്. പ്രദീപ് കുമാർ മുഖ്യപ്രഭാഷണം നടത്തി. ചടങ്ങിനോടനുബന്ധിച്ച് തെരഞ്ഞെടുക്കപ്പെട്ട രണ്ടുപേർക്ക് ഇലക്ട്രിക് വീൽചെയർ നൽകുകയും സ്ഥിരം പെൻഷൻ സ്കീമിന് തുടക്കം കുറിക്കുകയും ചെയ്തു. പാലുവള്ളി നിസാമുദ്ദീൻ, മന്നാനി ഓർഫനേജ് അസോസിയേഷൻ ജില്ലാ സെക്രട്ടറി ഫാദർ ബിജോയ് സി പി., ബി. കിഷോർ ഖിൽനാനി, യു. വിനോദ് കുമാർ തുടങ്ങിയവർ സംസാരിച്ചു. ജില്ലാ ട്രഷറർ ടി. ശിവകുമാർ വരവ്-ചെലവ് കണക്കുകൾ അവതരിപ്പിക്കുകയും കൃതജ്ഞത രേഖപ്പെടുത്തുകയും ചെയ്തു.
സമ്മേളനത്തിൽ വെച്ച് പുതിയ ജില്ലാ കമ്മിറ്റിയെയും അഞ്ച് താലൂക്കുകളുടെ ഭാരവാഹികളെയും പ്രഖ്യാപിച്ചു. പുതിയ ഭാരവാഹികളായി അഡ്വ. അയ്യപ്പൻ പിള്ള (പ്രസിഡന്റ്), എൻ. സുബ്രഹ്മണ്യൻ (സെക്രട്ടറി), ടി. പ്രമോദ് (ട്രഷറർ), കിഷോർ ഖിൽനാനി, ഡോ. ഹരികുമാർ (ജില്ലാ രക്ഷാധികാരികൾ), ഡോ. സി.എസ്. സാജൻ, ഡോ. ഡി. ഗിരിശങ്കർ (വൈസ് പ്രസിഡന്റുമാർ), ജി. സതീഷ് കുമാർ, യു. ജയകുമാർ (ജോയിന്റ് സെക്രട്ടറിമാർ) എന്നിവരെ തിരഞ്ഞെടുത്തു. കൂടാതെ മറ്റ് 12 അംഗങ്ങളുള്ള എക്സിക്യൂട്ടീവ് കമ്മിറ്റിയെയും യോഗം തിരഞ്ഞെടുത്തു.
