കൊച്ചി: ആർഎസ്എസ് എന്ന മൂന്ന് അക്ഷരങ്ങൾ ഇന്ന് ലോകം മുഴുവനും ചർച്ച ചെയ്യപ്പെടുന്ന പ്രബലമായ ഒരു സംഘടനയായി വളർന്നിട്ടുണ്ടെന്ന് വിശ്വഹിന്ദു പരിഷത്ത് അഖില ഭാരതീയ ജോയിന്റ് ജനറൽ സെക്രട്ടറി സ്ഥാണുമാലയൻ പറഞ്ഞു. കൊച്ചിമഹാനഗരത്തിലെ കലൂർ ഉപനഗരത്തിന്റെ വിജയദശമി ഉത്സവത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം.
സംഘസ്ഥാപകനായ ഡോ. കേശവ ബലിറാം ഹെഡ്ഗേവാറിന്റെ ജീവിതം മനസ്സിലാക്കിയാൽ മാത്രമേ സംഘത്തെ പൂർണ്ണമായി അറിയാൻ സാധിക്കൂ. സ്വാതന്ത്ര്യസമര കാലത്ത് ബ്രിട്ടീഷുകാർ നിരോധിച്ച വന്ദേമാതരം നാഗ്പൂരിലെ നീൽസിറ്റി ഹൈസ്കൂളിൽ വിദ്യാർത്ഥിയായിരുന്ന കേശവനും കൂട്ടുകാരും ധീരമായി മുഴക്കിയത് ചരിത്രമാണ്. ഭാരതത്തിന്റെ സനാതന ഹിന്ദു ധർമ്മവും സംസ്കാരവും സംരക്ഷിച്ചുകൊണ്ട് ഈ രാഷ്ട്രത്തെ വൈഭവത്തിന്റെ ഉന്നതങ്ങളിലെത്തിക്കുക എന്ന ലക്ഷ്യത്തോടെയാണ് ആർഎസ്എസ് രൂപീകൃതമായത്.ഹിന്ദുത്വമെന്നാൽ ഈ ജഗത്തിനെ മുഴുവൻ ഈശ്വരനായി കാണുന്ന സനാതന ദർശനമാണെന്നും, അത് ഏതെങ്കിലും ഒരു വിഭാഗത്തിന് മാത്രമുള്ളതല്ലെന്നും അദ്ദേഹം വ്യക്തമാക്കി. “ലോകാഃ സമസ്താഃ സുഖിനോ ഭവന്തു” എന്ന് ലോകത്തിന്റെ മുഴുവൻ നന്മയ്ക്കായി പ്രാർത്ഥിക്കുന്നവരാണ് സ്വയംസേവകർ എന്ന് അദ്ദേഹം പറഞ്ഞു.
ചരിത്രത്തിലുടനീളം രാജ്യത്തിന് പ്രതിസന്ധികൾ ഉണ്ടായപ്പോഴൊക്കെ ജീവത്യാഗം ചെയ്ത് മുന്നിൽ നിന്നത് സ്വയംസേവകരാണെന്നും അടിയന്തരാവസ്ഥക്കാലത്തും ചൈനീസ് യുദ്ധവേളയിലും രാജ്യം കണ്ട ആ സേവനങ്ങൾ ഇതിന് തെളിവാണെന്നും അദ്ദേഹം കൂട്ടിച്ചേർത്തു.
ചടങ്ങിൽ ഇലക്ട്രോണിക്സ് കോർപറേഷൻ ഓഫ് ഇന്ത്യയുടെ മുൻ ജി.എം. എസ്‌. ലക്ഷ്മി നാരായണൻ അധ്യക്ഷത വഹിച്ചു. കഴിഞ്ഞ പന്ത്രണ്ട് വർഷത്തിനിടയിൽ ഡിജിറ്റൽ രംഗത്തും (യു.പി.ഐ) ബഹിരാകാശ ശാസ്ത്രത്തിലും പ്രതിരോധ നിർമ്മാണ മേഖലയിലും ആണവ ഊർജ്ജ രംഗത്തും ഭാരതം കൈവരിച്ച സമാനതകളില്ലാത്ത പുരോഗതിയും നേട്ടങ്ങളും അദ്ദേഹം അധ്യക്ഷ പ്രഭാഷണത്തിൽ എടുത്തുപറഞ്ഞു. ഭാരതത്തിന്റെ ഈ കുതിപ്പ് ലോകരാഷ്ട്രങ്ങൾക്കിടയിൽ രാജ്യത്തിന്റെ അഭിമാനം ഉയർത്തിയിട്ടുണ്ടെന്നും പറഞ്ഞു.
ഉപനഗർ കാര്യവാഹ് കിരൺ വാര്യർ സ്വാഗതം പറഞ്ഞ പരിപാടിയിൽ ഇടപ്പള്ളി നഗർ സംഘചാലക് ആർ.സതീഷ് ചന്ദ്രനും പങ്കെടുത്തു.
