ജോധ്പൂര്(രാജസ്ഥാന്): യുദ്ധക്കളത്തിലും സംഗീതത്തിന് ആവേശമുണര്ത്താന് കഴിയുമെന്ന് ആര്എസ്എസ് സര്സംഘചാലക് ഡോ. മോഹന് ഭാഗവത്. ഒരുമിച്ചുചേരുന്നതിന്റെ സന്തോഷം മാത്രമല്ല, പടക്കളത്തിലെ ഊര്ജ്ജസ്വലതയും സംഗീതത്തിലൂടെ പ്രകടിപ്പിക്കാനാകും. ആത്മവിശ്വാസവും ആത്മാഭിമാനവും പകരാന് സംഗീതത്തിന് കഴിയുമെന്ന് അദ്ദേഹം ചൂണ്ടിക്കാട്ടി. ആര്എസ്എസ് ജോധ്പൂര് പ്രാന്തം സംഘടിപ്പിച്ച മരു നിനാദ് ഘോഷ് ശിബിരത്തിന്റെ സമാപന സാംഘിക്കില് സംസാരിക്കുകയായിരുന്നു അദ്ദേഹം.
സംസ്കാരസമ്പന്നനായ ഒരാള്ക്ക് മാത്രമേ രാജ്യത്തിനുവേണ്ടി നിസ്വാര്ത്ഥനായി പ്രവര്ത്തിക്കാനാകൂ എന്ന് സര്സംഘചാലക് പറഞ്ഞു. ആസക്തികളില് നിന്നും വിട്ടുനില്ക്കുന്ന ഒരാള് മാത്രമേ സന്തുഷ്ടനായിരിക്കൂ. മറ്റുള്ളവരുടെ സന്തോഷങ്ങളിലും ദുഃഖങ്ങളിലും സഹായിക്കുന്ന ഒരാള്ക്ക് സമൂഹത്തെ ഒന്നിപ്പിക്കാനും കഴിയുമെന്ന് അദ്ദേഹം പറഞ്ഞു.
ഘോഷ് വാദനത്തിനു പിന്നില് സംസ്കാരവും അച്ചടക്കവും ഉണ്ട്. അത് എല്ലാവരെയും ചേര്ത്തുനിര്ത്തുന്നതിന് വഴിയൊരുക്കുന്നുണ്ട്. നമ്മുടെ രാജ്യത്തിന് പുരാതനകാലം മുതല് തന്നെ യുദ്ധസംഗീതത്തിന്റെ പാരമ്പര്യമുണ്ട്. ഭഗവദ്ഗീതയില് ഇത് വിവരിച്ചിട്ടുണ്ട്. പണവ, പാഞ്ചജന്യ, ശംഖം തുടങ്ങിയ പേരുകള് അതില് പരാമര്ശിക്കപ്പെടുന്നു. വ്യക്തിഗീതങ്ങള്, ഗണഗീതങ്ങള്, ഘോഷ് എന്നിവയിലൂടെ, സംഘം സംഗീതത്തിന്റെ ഒരു ഘരാനയായി മാറിയിരിക്കുന്നു. യുദ്ധ സംഗീതവും ഭാരതീയസംഗീതത്തിന്റെ ഭാഗമാണ്. സംഗീതം ഒരു കലയാണ്, അത് ഭാരതീയ ജീവിതരീതി, പാരമ്പര്യങ്ങള്, മൂല്യങ്ങള് എന്നിവയെ ഉള്ക്കൊള്ളുന്നു. മനോഹരമായ ഗാനങ്ങളിലൂടെ ഭാവാത്മകമായ അന്തരീക്ഷം സൃഷ്ടിക്കുകയും വികാരങ്ങള് ഉണര്ത്തുകയും ചെയ്യുന്നു.സംഘത്തില് എല്ലാവരും ഒരുമിച്ചാണ് ഘോഷ് വാദനത്തില് ഏര്പ്പെടുന്നത്. അതിലൂടെ എല്ലാവരുടെയും ഹൃദയങ്ങള് ഒന്നിക്കുന്നു. ഒരു സ്ഥലത്ത് ഒരുമിച്ച് കൂടുക, ഒരുമിച്ച് ജീവിക്കുക, ഒരുമിച്ച് പ്രവര്ത്തിക്കുക എന്നിവയാണ് സംഘത്തിന്റെ രീതി, സര്സംഘചാലക് പറഞ്ഞു.
ലുനി ശിക്കാര്പുരയിലെ ശ്രീ രാജാറാം ആശ്രമത്തിന്റെ കാമ്പസില് നടന്ന സാംഘിക്കില് 15,000 സ്വയംസേവകര് പങ്കെടുത്തു. ജോധ്പൂര് പ്രാന്ത സംഘചാലക് ഹര്ദയാല് വര്മ്മ, മഹേഷ് റാം മേഘ്വാള്, മേജര് ജനറല് അര്ജുന് സിംഗ് റാത്തോഡ് എന്നിവരും സന്നിഹിതരായിരുന്നു.
























