ഇസ്ലാമാബാദ്: താലിബാന് വേണ്ടി അന്താരാഷ്ട്രസമൂഹത്തോട് അഭ്യര്ത്ഥനയുമായി പാകിസ്ഥാന്. ഭരിക്കാന് വേണ്ട സമയം താലിബാന് നല്കണമെന്നാണ് അഭ്യര്ത്ഥന. സര്ക്കാര് രൂപീകരിക്കാനും കാര്യങ്ങള് നടത്താനും സമയം നല്കണമെന്ന് പാക് ആഭ്യന്തര മന്ത്രി ഷെയ്ഖ് റാഷിദ് അഹമ്മദ് പറഞ്ഞു. മനുഷ്യത്വം പരിഗണിച്ച് അവര്ക്ക് ഭക്ഷണവും മരുന്നുകളും മറ്റ് അവശ്യവസ്തുക്കളും നല്കണമെന്നും റാഷിദ് അഹമ്മദിനെ ഉദ്ധരിച്ച് ഡോണ് പത്രം പറയുന്നു. താലിബാന് വേണ്ടുന്ന സാമ്പത്തികവും മാനവവിഭവശേഷിയും നല്കണമെന്നും അദ്ദേഹം പറഞ്ഞു.
ഇസ്ലാമാബാദിലെ യുഎന് ഹൈക്കമ്മീഷണര് ഫിലിപ്പോ ഗ്രാന്ഡിയുമായുള്ള കൂടിക്കാഴ്ചയിലാണ് റാഷിദ് ഈ അഭ്യര്ത്ഥന മുന്നോട്ടുവെച്ചത്. അഫ്ഗാനിസ്ഥാനില് കഴിയുന്ന അഫ്ഗാന് പൗരന്മാരെയും വിദേശികളെയും ഒഴിപ്പിക്കാന് പാകിസ്താന് രാവും പകലും പ്രവര്ത്തിക്കുന്നുണ്ട്. ‘നിലവിലെ സാഹചര്യത്തിന്റെ പശ്ചാത്തലത്തില്, പാകിസ്ഥാനില് അഫ്ഗാന് അഭയാര്ഥികളോ അഭയാര്ത്ഥി ക്യാമ്പുകളോ ഇല്ല, റാഷിദ് പറഞ്ഞു.
താലിബാന് കഴിഞ്ഞയാഴ്ച അഫ്ഗാനിസ്ഥാനിലെ ഇസ്ലാമിക് എമിറേറ്റിന്റെ ഇടക്കാല സര്ക്കാര് രൂപീകരിച്ചിരുന്നു. താലിബാനുമായി ബന്ധം പുലര്ത്തിയിരുന്ന പാകിസ്താന്, ഭരണകൂടത്തെ പരസ്യമായും രഹസ്യമായും പിന്തുണയ്ക്കുന്നുവെന്ന വാര്ത്തകള് നേരത്തെ ഇസ്ലാമാബാദ് നിഷേധിച്ചിരുന്നു. അതിനിടെയാണ് റാഷിദിന്റെ അഭ്യര്ത്ഥന പരസ്യമാകുന്നത്.
Discussion about this post