ജമ്മു: താങ്പാവയില്‍ ഭീകരരെ കടിച്ചു കുടഞ്ഞ സൂം എന്ന വീരനായകന്‍റെ ജീവരക്ഷയ്ക്കായി പ്രാര്‍ത്ഥനയിലാണ് നാട്. അനന്ത് നാഗില്‍ ഇന്നലെ നടന്ന ഭീകരവേട്ടയ്ക്കിടയിലാണ് സൂമിന് ഗുരുതരമായ പരിക്കേറ്റത്. ഭീകര വിരുദ്ധസേനയില്‍ ഉന്നത പരിശീലനം നേടിയ നായയാണ് സൂം. താങ്പാവയിലെ ഒളിത്താവളത്തിലേക്ക് മിന്നല്‍വേഗത്തില്‍ പാഞ്ഞുചെന്ന സൂമാണ് രണ്ട് ഭീകരരെ കടിച്ചുകുടഞ്ഞത്. ഒളിത്താവളത്തില്‍ നിന്ന് സൂം വലിച്ച് പുറത്തിട്ട ലഷ്‌കര്‍ ഭീകരരെ പിന്നീട് സൈന്യം വെടിവച്ചുകൊല്ലുകയായിരുന്നു.
താങ്പാവ മേഖലയില്‍ ഞായറാഴ്ച രാത്രിയോടെയാണ് ഭീകരരുടെ സാന്നിധ്യമുണ്ടെന്ന് സുരക്ഷാ സേനയ്ക്ക് വിവരം ലഭിത്. രാത്രിയില്‍ ഒളിത്താവളത്തിലേക്ക് കടക്കാനുള്ള വഴിയൊരുക്കാനാണ് സൂമിനെ സൈനികര്‍ മുന്നില്‍ നടത്തിയത്. മിന്നല്‍വേഗത്തിലായിരുന്നു സൂമിന്‍റെ ആക്രമണം. വീടിനുള്ളില്‍ പാഞ്ഞുകയറിയ സൂം ഭീകരരെ കടന്നാക്രമിച്ചു. ഏറ്റുമുട്ടലിനിടയില്‍ രണ്ടു തവണയാണ് സൂമിന് വെടിയേറ്റത്. എന്നിട്ടും പിന്മാറാന്‍ അവന്‍ ഒരുക്കമായിരുന്നില്ല.
ഗുരുതരമായി പരിക്കേറ്റ സൂം സൈന്യത്തിന്‍റെ വെറ്ററിനറി ആശുപത്രിയില്‍ ചികിത്സയിലാണ്. കരസേനയുടെ ചിനാര്‍ കോര്‍പ്‌സ് ഡിവിഷന്‍ സൈനിക ഓപ്പറേഷനില്‍ ധീരമായി പങ്കെടുത്ത സൂമിനെക്കുറിച്ച് വീഡിയോയും പുറത്തിറക്കി.
തെക്കന്‍ കശ്മീരിലെ നിരവധി ഭീകരവിരുദ്ധ നടപടികളുടെ ഭാഗമാണ് സൂമെന്ന് സൈനിക വൃത്തങ്ങള്‍ പറഞ്ഞു. ‘സൂം ഉയര്‍ന്ന പരിശീലനം ലഭിച്ച, പ്രതിബദ്ധതയുള്ള നായയാണ്. ഒളിവിലിരിക്കുന്ന തീവ്രവാദികളെ കണ്ടെത്തി പുറത്തുകൊണ്ടുവരാന്‍ മിടുക്കനാണ് സൂം’ ഉദ്യോഗസ്ഥര്‍ പറഞ്ഞു.
രണ്ട് ലഷ്‌കര്‍-ഇ-തൊയ്ബ ഭീകരര്‍ കൊല്ലപ്പെട്ട ഓപ്പറേഷനില്‍ നിരവധി സൈനികര്‍ക്കും പരിക്കേറ്റു. ഏറ്റുമുട്ടല്‍ നടന്ന സ്ഥലത്ത് നിന്ന് ആയുധങ്ങളും വെടിക്കോപ്പുകളും ഉള്‍പ്പെടെയുള്ളവ കണ്ടെടുത്തു.
Discussion about this post