എറണാകുളം: മണിപ്പൂർ സംഘർഷവുമായി ബന്ധപ്പെട്ട് വ്യാജ സന്ദേശം പ്രചരിപ്പിച്ച സംഭവത്തിൽ ഡിവൈഎഫ്ഐ നേതാവിനെതിരെ കേസ്. ഡിവൈഎഫ്ഐ പ്രാദേശിക നേതാവ് അനീഷ് വർഗ്ഗീസിനെതിരെയാണ് പോലീസ് കേസ് എടുത്തത്. അങ്കമാലി പോലീസിന്റേതാണ് നടപടി.
മണിപ്പൂർ സംഘർഷം ആസൂത്രിതമാണെന്നും സംഭവത്തിന് പിന്നിൽ ആർഎസ്എസ് ആണെന്നുമാണ് ഇയാൾ പ്രചരിപ്പിച്ചത്. സമൂഹമാദ്ധ്യമത്തിൽ ഇയാൾ പങ്കുവച്ച പോസ്റ്റ് വ്യാപകമായി പ്രചരിച്ചിരുന്നു. ഇത് ശ്രദ്ധയിൽപ്പെട്ടതോടെ എലാവൂർ സ്വദേശി അനീഷ് പെരുമ്പള്ളിയാണ് പോലീസിൽ പരാതി നൽകിയത്.
മണിപ്പൂരിൽ സംഘർഷങ്ങൾ തുടരുന്നതിനിടെ ഈ മാസം 12 നായിരുന്നു അനീഷ് വർഗ്ഗീസ് ഫേസ്ബുക്കിൽ പോസ്റ്റിട്ടത്. പരാതിയിൽ ചൂണ്ടിക്കാട്ടുന്ന കാര്യങ്ങൾ സത്യമാണെന്ന് വ്യക്തമായതോടെയായിരുന്നു പോലീസ് കേസ് എടുത്തത്.
