തിരുവനന്തപുരം: മഹിളാ സമന്വയ വേദിയുടെ നേതൃത്വത്തിൽ ദേശ വ്യാപകമായി സംഘടിപ്പിക്കുന്ന സ്ത്രീശക്തി സമ്മേളനങ്ങളുടെ തിരുവനന്തപുരം ജില്ലാ സ്വാഗതസംഘം ഓഫീസ് ശ്രീകണ്ഠേശ്വരത്ത് പദ്മശ്രീ ലക്ഷ്മിക്കുട്ടി അമ്മ ഉദ്ഘാടനം ചെയ്തു. ശാസ്ത്രജ്ഞർ, വിദ്യാഭ്യാസ മേഖലയിലുള്ളവർ, കലാ, കായിക രംഗത്തുള്ളവർ, അഭിഭാഷകർ, ആരോഗ്യ പ്രവർത്തകർ , എഴുത്തുകാർ , തൊഴിലുറപ്പ് തൊഴിലാളികൾ തുടങ്ങി സർവ മേഖലകളിലുമുള്ള ആയിരക്കണക്കിന് വ നിതകളുടെ മഹാസംഗമം എല്ലാ ജില്ലകളിലും സംഘടിപ്പിക്കുകയാണ്ലക്ഷ്യം. തിരുവനന്തപുരം ജില്ലാ സ്ത്രീശക്തി സമ്മേളനം നവംബർ 26 ന് ഉദയ കൺവൻഷൻ സെന്ററിൽ നടക്കും. സ്വാഗത സംഘം ഓഫീസ് ഉദ്ഘാടന സമ്മേളനത്തിൽ മഹിള സമന്വയ വേദി ജില്ലാ ജോയിന്റ് കൺവീനർ നീലിമ ആർ. കുറുപ്പ് അധ്യക്ഷത വഹിച്ചു, സംസ്ഥാന കൺവീനർ അഡ്വ. ജി. അഞ്ജനാ ദേവി മുഖ്യ പ്രഭാഷണം നടത്തി. രാഷ്ട്രീയ സ്വയംസേവക സംഘം തിരുവനന്തപുരം വിഭാഗ് സംഘചാലക് പ്രൊഫ. എം.എസ്. രമേശൻ സംസാരിച്ചു. ലക്ഷ്മിപ്രിയ സ്വാഗതവും സൂര്യ പ്രേം നന്ദിയും പറഞ്ഞു.വിവിധ സംഘടനാ പ്രവർത്തകർ പരിപാടിയിൽ പങ്കെടുത്തു.
Discussion about this post