കോഴിക്കോട്: എഐയുടെ കടന്നുവരവോടെ സിനിമയുടെ നിലനിൽപ്പുപോലും ആശങ്കയിലാണെന്ന് നോവലിസ്റ്റ് പി.ആർ. നാഥൻ. കേസരി’നവരാത്രി സർഗോത്സവത്തിന്റെ ഭാഗമായി നടക്കുന്ന ജയരാജ് ചലച്ചിത്രോത്സവം ഉദ്ഘാടനം ചെയ്യുകയായിരുന്നു അദ്ദേഹം.
താൻ തിരക്കഥ എഴുതി ഭരതൻ സംവിധാനം ചെയ്ത ചാട്ടം എന്ന സിനിമ റിമേയ്ക്ക് ചെയ്യാൻ ഭരതന്റെ മകൻ സിദ്ധാർത്ഥ് വന്ന് ചർച്ച നടത്തിയിരുന്നു. സിനിമ കലയെന്നതിലുപരി സാങ്കേതികവിദ്യയെ അടിസ്ഥാനമാക്കിയുള്ളതാണ്. കാലഘട്ടം മാറുന്നതനുസരിച്ച് പഴയ സാങ്കേതികവിദ്യയെ ജനങ്ങൾക്ക് ഇഷ്ടമില്ലാതാവും. പുതിയ സാങ്കേതികവിദ്യയെ ഇഷ്ടപ്പെടും.
അതുകൊണ്ടാണ് പഴയകാല സിനിമകൾ റിമേയ്ക്ക് ചെയ്യപ്പെടുന്നത്. ഏതു മാധ്യമമായാലും ആളുകളെ അധികം വെറുപ്പിച്ചാൽ നിലനിൽപ്പില്ല. ഒരുകാലത്ത് നൂറുകണക്കിന് റേഡിയോ നാടകങ്ങൾ എഴുതിയെങ്കിൽ ഇന്ന് റേഡിയോ നാടകങ്ങൾക്ക് ശ്രോതാക്കൾ കുറഞ്ഞു. നാടകങ്ങൾക്കും സീരിയലുകൾക്കും പ്രേക്ഷകരും കുറയുന്നുണ്ട്. ഏതുമാധ്യമവും എത്രകാലം ഉണ്ടാകുമെന്നറിയാത്തത് അനിശ്ചിതത്വമാണ് ഇപ്പോഴുള്ളതെന്നും പി.ആർ. നാഥൻ പറഞ്ഞു.
ചലച്ചിത്ര നിരൂപകനും മുതിർന്ന മാധ്യമപ്രവർത്തകനുമായ ഹരീഷ് പി. കടയപ്രത്ത് അധ്യക്ഷത വഹിച്ചു. ഉദ്ഘാടനച്ചടങ്ങിനായി ജയരാജ് സംവിധാനം ചെയ്ത ദേശടനം പ്രദർശിപ്പിച്ചു. ഇന്ന് ഉച്ചയ്ക്ക് 2.30ന് ചാലപ്പുറം കേസരി ഭവനിൽ ഭയാനകം എന്ന സിനിമ പ്രദർശിപ്പിക്കും.
