അടിമാലി: ആർഎസ്എസ് ശതാബ്ദി കാര്യക്രമങ്ങളുടെ ഭാഗമായി സമാജത്തിലെ പ്രമുഖ വ്യക്തികളുമായി ആശയവിനിമയം നടത്തിവരുന്ന ‘പ്രബുദ്ധപൗരസംഗമം’ ദേവികുളം ജില്ലയിൽ നടന്നു. അടിമാലി എദൻ ഓഡിറ്റോറിയത്തിൽ ‘വൈഭവ് ഭാരതം വൈചാരിക സദസ്സ്’ എന്ന പേരിൽ സംഘടിപ്പിച്ച പരിപാടിയിൽ ദേവികുളം ജില്ലാ സംഘചാലക് ഇ.എം. മോഹനൻ എടപ്പാട്ടി അധ്യക്ഷത വഹിച്ചു.
സംഘത്തിന്റെ വൈചാരിക അടിത്തറ എന്ന വിഷയം ദക്ഷിണ കേരള പ്രാന്ത സഹകാര്യവാഹ് കെ.ബി. ശ്രീകുമാർ അവതരിപ്പിച്ചു.
ഭാരതത്തിന്റെ ഏകത സാംസ്കാരികമാണെന്നും രാഷ്ട്രത്തെ മാതൃഭൂമിയായി കാണുന്ന ജനതയാണ് അതിനെ നിലനിർത്തുന്നതെന്നും അദ്ദേഹം വ്യക്തമാക്കി. ഈ ചിന്തയ്ക്കും മനോഭാവത്തിനും കോട്ടം തട്ടിയപ്പോഴാണ് രാഷ്ട്രം അടിമത്തത്തിലാണ്ടത്. അതുപോലെ രാഷ്ട്രത്തെ ആദർശമായി കണ്ട് ജീവിക്കുന്ന വ്യക്തികളെ സൃഷ്ടിക്കുന്നതിനാണ് ഡോക്ടർജി സംഘം ആരംഭിച്ചതെന്നും അദ്ദേഹം കൂട്ടിച്ചേർത്തു.
സംഘം നിർമ്മിച്ചെടുത്ത സ്വയംസേവകർ രാഷ്ട്രത്തെ സാംസ്കാരികമായും ദേശീയ ബോധത്താലും സജീവമാക്കി മുന്നോട്ട് നയിക്കുകയാണ്. 100 വർഷം പിന്നിടുന്ന സംഘം ഇന്ന് നൂറോളം രാജ്യങ്ങളിൽ നേരിട്ടും അനുബന്ധ പ്രവർത്തനങ്ങളുമായി വ്യാപിച്ച് നിൽക്കുന്നു. ശതാബ്ദിയുടെ ഈ വേളയിൽ സംഘം മുന്നോട്ടുവെക്കുന്ന കുടുംബപ്രബോധൻ, സാമാജിക സമരസത, സ്വദേശി, പരിസ്ഥിതി, പൗരബോധം തുടങ്ങിയ പ്രവർത്തനങ്ങളിൽ സജ്ജനങ്ങളുടെ സജീവ സഹകരണവും പിന്തുണയും ഉണ്ടാകണമെന്ന് അദ്ദേഹം പറഞ്ഞു.
വന്ദേമാതരത്തോടെ ആരംഭിച്ച പരിപാടിയിൽ ദേവികുളം ജില്ലാ ബൗദ്ധിക് ശിക്ഷൺ പ്രമുഖ് വി.ജി. സജീഷ് സ്വാഗതവും എം.എൻ. പ്രീതി ടീച്ചർ കൃതജ്ഞതയും രേഖപ്പെടുത്തി. തുടർന്ന് ദേശീയഗാനത്തോടെ കാര്യക്രമങ്ങൾ സമാപിച്ചു.
