മൗണ്ട് അബു(രാജസ്ഥാന്): പാര്ലമെന്ററി സ്റ്റാന്ഡിങ് കമ്മിറ്റി നിര്ദ്ദേശിച്ച ജീന് എഡിറ്റിങ് അധിഷ്ഠിത കാര്ഷിക സംവിധാനം ഒഴിവാക്കണമെന്ന് കിസാന് സംഘ് ആവശ്യപ്പെട്ടു. ജീന് എഡിറ്റിങ് വിളകളുടെ സ്വാഭാവികത നഷ്ടപ്പെടുത്തും. പഞ്ചാബിലെ മുക്ത്സറില് ബിടി പരുത്തി ഉപയോഗിച്ചത് ആവാസവ്യവസ്ഥയെയും പരിസ്ഥിതി സന്തുലിതാവസ്ഥയെയും തകര്ക്കുന്ന സാഹചര്യത്തിലെത്തിയത് പാഠമാകണമെന്ന് കിസാന് സംഘ് ജനറല് സെ്രട്ടറി മോഹിനിമോഹന് മിശ്ര ചൂണ്ടിക്കാട്ടി. മൗണ്ട് ആബുവില് ചേര്ന്ന അഖില ഭാരതീയ കാര്യകാരിണി ബൈഠക്കിന് ശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
വിദേശ സ്ഥാപനങ്ങളെയോ സുരക്ഷിതമല്ലാത്ത സാങ്കേതികവിദ്യകളെയോ അന്ധമായി അനുകരിക്കുന്നതിനുപകരം, രാജ്യം തനിമയ്ക്ക് അനുസൃതമായ പരമ്പരാഗത കാര്ഷിക രീതികളെ അടിസ്ഥാനമാക്കി പരിഹാരങ്ങള് കണ്ടെത്തണം. സമയം ലാഭിക്കാനുള്ള മറവില് ജീന് എഡിറ്റിങ്ങിലൂടെ ജനിതക, കാലാവസ്ഥാ-പാരിസ്ഥിതിക കൃഷി ഉപയോഗിക്കുന്നത് ദൂരവ്യാപകമായ പ്രതികൂല പ്രത്യാഘാതങ്ങള് ഉണ്ടാക്കുമെന്ന് കിസാന് സംഘ് മുന്നറിയിപ്പ് നല്കി.
പയര്വര്ഗ്ഗങ്ങള്, എണ്ണക്കുരുക്കള്, ഭക്ഷ്യ എണ്ണകള് എന്നിവയുടെ ഉത്പാദനത്തില് സ്വയംപര്യാപ്തത കൈവരിക്കുന്നതിന് സമഗ്രവും പ്രായോഗികവുമായ ഒരു സമീപനം സ്വീകരിക്കണം. സ്വാതന്ത്ര്യം ലഭിച്ച് 78 വര്ഷങ്ങള്ക്ക് ശേഷവും, പയര്വര്ഗ്ഗങ്ങള്ക്കും ഭക്ഷ്യ എണ്ണകള്ക്കും വേണ്ടി രാജ്യം വിദേശ രാജ്യങ്ങളെ ആശ്രയിക്കുന്നത് ഗുരുതരമായ ഒരു ആശങ്കയാണ്. ഇത് രാജ്യത്തിന്റെ ഭക്ഷ്യസുരക്ഷയുമായും ദേശീയ പരമാധികാരവുമായും നേരിട്ട് ബന്ധപ്പെട്ടിരിക്കുന്ന വിഷയമാണെന്ന് മോഹിനി മോഹന് മിശ്ര പറഞ്ഞു.
നിലവിലുള്ള ‘ഏകവിള സമ്പ്രദായം’ ജൈവവൈവിധ്യത്തിനും ഭക്ഷ്യ വൈവിധ്യത്തിനും കാലാവസ്ഥയ്ക്കും പൂര്ണ്ണമായും അനുചിതവും ചൂഷണപരവുമാണെന്ന് അദ്ദേഹം ചൂണ്ടിക്കാട്ടി. മണ്ണിന്റെ ഫലഭൂയിഷ്ഠത നിലനിര്ത്തുന്നതിനും കര്ഷകരുടെ ചെലവ് കുറയ്ക്കുന്നതിനും ശക്തമായ വിള വൈവിധ്യവല്ക്കരണവും (ഇടവിള കൃഷി, സമ്മിശ്ര കൃഷി, വിള ഭ്രമണം), ഗോ കൃഷി വാണിജ്യവും (പശു അധിഷ്ഠിത കൃഷി) നടപ്പാക്കണം.
പയര്വര്ഗ്ഗങ്ങളുടെയും എണ്ണക്കുരുക്കളുടെയും നൂറ് ശതമാനം സംഭരണം സര്ക്കാര് ഉറപ്പ് നല്കണം. പയര്വര്ഗ്ഗങ്ങളുടെ മാത്രം സംഭരണം പരിമിതമായിരുന്നിട്ടും, 2016 ല് ഉത്പാദനത്തില് ഉണ്ടായ ഗണ്യമായ വര്ധന ശ്രദ്ധേയമാണ്. സാധാരണയായി ഉപയോഗിക്കുന്ന പ്രജനന രീതികളിലൂടെ വികസിപ്പിച്ചെടുത്ത മെച്ചപ്പെട്ട ഇനങ്ങളുടെയും നാടന് വിത്തുകളുടെയും കൃഷിയും സംരക്ഷണവും പ്രോത്സാഹിപ്പിക്കണം. ചെറുകിട, ഇടത്തരം കര്ഷകര്ക്ക് മൃഗസംരക്ഷണം പ്രത്യേകമായി പ്രോത്സാഹിപ്പിക്കണം, മോഹിനി മോഹന് മിശ്ര പറഞ്ഞു.
