പാലക്കാട്: കേരളത്തിൽ ഇരു ഭീകരതകൾ ഉണ്ടെന്ന സി പി എം പ്രചാരണം ഇസ്ലാമിക ഭീകരതയെ സംരക്ഷിക്കാനുള്ള കുടില തന്ത്രമാണെന്ന് പ്രജ്ഞാപ്രവാഹ് ദേശീയ സംയോജകൻ ജെ.നന്ദകുമാർ പറഞ്ഞു. പോപ്പുലർ ഫ്രണ്ട് അക്രമത്തിൽ കൊല്ലപ്പെട്ട ശ്രീനിവാസൻ്റെ വീട് സന്ദർശിച്ചതിനു ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ഈ നിരർത്ഥക വാദം വർത്തമാന യഥാർത്ഥ്യങ്ങളെ ദുർബലപ്പെടുത്തുന്നതാണ്. അതിനേക്കാൾ ഭീകരം അത് കേരളത്തിൻ്റെ ഭാവിയെ അപകടത്തിലാക്കുന്നതാണ്.
കേരളത്തിൽ പോപ്പുലർ ഫ്രണ്ടിൻ്റെ അക്രമത്തിനിരയാകാത്ത രാഷ്ട്രീയ പാർടികളില്ല. നാദാപുരത്തെ ബിനുവിൻ്റെയും മഹാരാജാസ് കോളജിലെ അഭിമന്യുവിൻ്റെയും കൊലപാതകികളെ വെള്ളപൂശാനാണ് സി പി എം ഇരു ഭീകരതാ പ്രചാരണവുമായി രംഗത്തെത്തിയിരിക്കുന്നത്. ആർഎസ്എഎസിനെ സംഘടനാപരമായി തകർക്കാൻ ശ്രമിച്ച സി പി എം അതിൽ ദയനീയമായി പരാജയപ്പെട്ടപ്പോൾ അക്രമം ഔട്ട്സോഴ്സ് ചെയ്യുകയാണ്. സംഘടിത വോട്ട് ബാങ്കിനെ ഭയന്ന് കോൺഗ്രസും ഭീകരപ്രവർത്തനത്തെ മൗനമായി പിന്തുണക്കുകയാണ്.പാലക്കാട് നഗരത്തിൽ നടന്ന ഭീകരാക്രമണത്തെ അപലപിക്കാൻ പാലക്കാട് എം എൽ എ ഇതുവരെ തയാറായിട്ടില്ല. പള്ളികളെ അക്രമികൾ ദുരുപയോഗം ചെയ്തിട്ടും എം.എൽ എ മൗനം പാലിക്കുന്നത് ദുരൂഹമാണ്.
ലക്ഷണമൊത്ത ഭീകരാക്രമണങ്ങളാണ് പോപ്പുലർ ഫ്രണ്ട് നടപ്പാക്കുന്നത്.ഇതിന് പള്ളികളെ ദുരുപയോഗം ചെയ്യുന്നു. അക്രമത്തിനുള്ള ആസൂത്രണത്തിനും കൊലപാതകികളുടെ ഒളിത്താവളമായും പളളികളെ ഉപയോഗിക്കുന്നു. മുസ്ലിം സമൂഹത്തെ മൊത്തം കരിവാരിത്തേക്കുന്ന ഇത്തരം നടപടികൾക്കെതിരെ മുസ്ലീം സംഘടനകളും സാമുദായിക നേതാക്കളും രംഗത്തു വരാത്തത് ആശ്ചര്യകരമാണ്. മാറാട് കൂട്ടക്കൊലയിലും പള്ളികളെ ദുരുപയോഗം ചെയ്തിരുന്നു. അതിഭീകരമായ മാറാട് കൂട്ടക്കൊല സൃഷ്ടിച്ച ഭീകരാന്തരീക്ഷത്തേയും.
ജനാധിപത്യ രീതികളിലൂടെ അതിജീവിക്കാൻ ഒറ്റക്കെട്ടായി നിലനിന്ന ഹിന്ദുസമൂഹത്തിന് കഴിഞ്ഞു.അക്രമികളും അതിന് ഒത്താശ നൽകുന്നവരും ഈ പാഠം ഓർമ്മിക്കണം,അദ്ദേഹം പറഞ്ഞു.
