ലഖ്നൗ: ഇന്ത്യ മതേതരമായി തുടരുന്നത് ഹിന്ദു ഭൂരിപക്ഷമായതുകൊണ്ടാണെന്ന് യുപി മുഖ്യമന്ത്രി യോഗി ആദിത്യനാഥ്. ഒരു സ്വകാര്യ ചാനലിന് നല്കിയ പ്രത്യേക അഭിമുഖത്തിലാണ് അദ്ദേഹം നിലപാട് ആവര്ത്തിച്ചത്. രാജ്യത്തെ എല്ലാ വിശ്വാസങ്ങളെയും ഉള്ക്കൊള്ളാനും സംരക്ഷിക്കാനുമുള്ള കരുത്ത് ഹിന്ദുത്വത്തിനുണ്ടെന്നും അത് രാഷ്ട്രധര്മ്മമാണെന്നും അദ്ദേഹം പറഞ്ഞു. സനാതനധര്മ്മം ഏതെങ്കിലും ഒരു ആരാധാനാ മാര്ഗമോ ആചാര പദ്ധതിയോ അല്ല, അത് ഇന്ത്യയുടെ ദേശീയതയാണ്. എല്ലാ മതവിശ്വാസങ്ങള്ക്കും ഇടമുള്ള ജീവിതപദ്ധതിയാണ്, യോഗി ആദിത്യനാഥ് പറഞ്ഞു.
ഇസ്ലാം, കൃസ്ത്യന് വിശ്വാസങ്ങള് വേറിട്ട എന്തെങ്കിലുമാണെന്ന് കരുതേണ്ടതില്ലെന്ന് അദ്ദേഹം ചോദ്യത്തിന് മറുപടിയായി പറഞ്ഞു. ഏത് പ്രതിസന്ധിയിലും സനാതനധര്മ്മ പരമ്പരയില്പ്പെട്ടവരുടെ സംരക്ഷണം അവര്ക്കുണ്ട്. ഭാരതം എല്ലായ്പോഴും എല്ലാവരെയും സംരക്ഷിച്ചു. ഈ രാജ്യം മതേതരമായിത്തുടരുന്നതിന് കാരണം ഹിന്ദു ഭൂരിപക്ഷമാണെന്നത് മാത്രമാണ്. വസുധൈവ കുടുംബകമാണ് അതിന്റെ ആദര്ശം. ലോകത്തിലെ പല രാജ്യങ്ങളിലും ന്യൂനപക്ഷജനത ഇല്ലാതാക്കപ്പെടുകയും അവരുടെ ആരാധനാലയങ്ങള് നശിപ്പിക്കുകയും ചെയ്യുന്നു, അവിടെ അത്തരം കൃത്യങ്ങളെ ചോദ്യം ചെയ്യാന് പോലുമാളില്ല. എന്നാല് ഭാരതത്തില് അത് നടക്കില്ല, അദ്ദേഹം പറഞ്ഞു.
രാമചരിതമാനസം പോലുള്ള പവിത്ര ഗ്രന്ഥങ്ങളോടുള്ള ചിലരുടെ എതിര്പ്പിന്റെ അടിസ്ഥാനം അവരുടെ നിലനില്പ് മാത്രമാണെന്ന് യോഗി പറഞ്ഞു. ഒരൊറ്റ ജനതയെന്ന നിലയില് മുന്നേറാനുള്ള നാടിന്റെ പരിശ്രമങ്ങളെ ജാതി പറഞ്ഞ് ഭിന്നിപ്പിക്കുക മാത്രമാണ് ഉന്നം. രാജ്യത്ത് ഇത്തരം ഭിന്നിപ്പിന്റെ ശക്തികളാണ് ആരാധനാലയങ്ങള് തകര്ത്തത്. അധിനിവേശശക്തികള് നമ്മുടെ ഐക്യത്തെ തകര്ക്കാനാണ് അത് ചെയ്തത്. അന്ന് ഇല്ലാതാക്കിയതെല്ലാം പുതിയ ഭാരതം വീണ്ടെടുക്കുകയാണ്. അയോധ്യയിലെ ശ്രീരാമക്ഷേത്രം ഒരു ഉദാഹരണം മാത്രമാണെന്നും യുപി മുഖ്യമന്ത്രി പറഞ്ഞു.
Discussion about this post