ഇംഫാല്‍: മണിപ്പൂരിലെ സംഘര്‍ഷാവസ്ഥയില്‍ അയവ്. സ്ഥിതിഗതികള്‍ സൈന്യത്തിന്‍റെ സഹായത്തോടെ നിയന്ത്രണവിധേയമാക്കിയെന്ന് സംസ്ഥാന സര്‍ക്കാര്‍ അറിയിച്ചു. ഇന്ത്യന്‍ വ്യോമസേന ആസാമിലെ രണ്ട് എയര്‍ഫീല്‍ഡുകളില്‍ നിന്ന് സി 17 ഗ്ലോബ്മാസ്റ്ററും എഎന്‍ 32 വിമാനവും ഉപയോഗിച്ച് തുടര്‍ച്ചയായി നിരീക്ഷണം നടത്തുന്നുണ്ട്. മലയോര മേഖലയിലെ മെയ്തിയ ഗോത്രവര്‍ഗ ഭൂരിപക്ഷമേഖലകള്‍ക്ക് നേരെയാണ് അക്രമം കൂടുതലായി നടന്നത് എന്നതിനാലാണ് വ്യോമസേനയുടെ സഹകരണം തേടിയത്.
മുഖ്യമന്ത്രി എന്‍ ബിരേന്‍ സിങ്ങുമായി കൂടിക്കാഴ്ച നടത്തിയ ശേഷം മടങ്ങുകയായിരുന്ന ബിജെപി എംഎല്‍എ വുങ്സാഗിന്‍ വാല്‍ട്ടെയ്ക്ക് നേരെയും അക്രമമുണ്ടായി. ഫെര്‍സാള്‍ ജില്ലയിലെ തന്‍ലോണില്‍ നിന്ന് മൂന്ന് തവണ എംഎല്‍എയായ വാല്‍ട്ടെ, ഇംഫാലിലെ തന്‍റെ ഔദ്യോഗിക വസതിയിലേക്ക് പോകുന്നതിനിടെയാണ് ആക്രമിക്കപ്പെട്ടത്.
അതിനിടെ, ക്രമസമാധാന പ്രശ്നത്തെത്തുടര്‍ന്ന് മണിപ്പൂരിലേക്കുള്ള എല്ലാ ട്രെയിനുകളും നോര്‍ത്ത് ഈസ്റ്റ് ഫ്രോണ്ടിയര്‍ റെയില്‍വേ നിര്‍ത്തിവച്ചു. സ്ഥിതി മെച്ചപ്പെടുന്നതുവരെ ട്രെയിനുകളൊന്നും അനുവദിക്കില്ല. മണിപ്പൂര്‍ സര്‍ക്കാര്‍ നിര്‍ദ്ദേശത്തെ തുടര്‍ന്നാണ് തീരുമാനമെന്ന് എന്‍എഫ് റെയില്‍വേയുടെ സിപിആര്‍ഒ സബ്യസാചി ഡെ പറഞ്ഞു.
കേന്ദ്ര ആഭ്യന്തരമന്ത്രി അമിത് ഷാ ഇന്നലെ നിശ്ചയിച്ചിരുന്ന മണിപ്പൂര്‍ സന്ദര്‍ശനം റദ്ദാക്കി. കഴിഞ്ഞ ദിവസം മണിപ്പൂരിലെയും സമീപ സംസ്ഥാനങ്ങളിലെയും മുഖ്യമന്ത്രിമാരുമായും ദേശീയ-സംസ്ഥാന ഉന്നത ഉദ്യോഗസ്ഥരുമായും വീഡിയോ കോണ്‍ഫറന്‍സ് വഴി അമിത്ഷാ കൂടിക്കാഴ്ച നടത്തി സ്ഥിതിഗതികള്‍ വിലയിരുത്തി.
രണ്ട് ദിവസമായി തുടരുന്ന ആള്‍ക്കൂട്ട അക്രമത്തില്‍ 13 പേരെങ്കിലും കൊല്ലപ്പെട്ടതായാണ് റിപ്പോര്‍ട്ടുകള്‍. 7,500ലേറെ ആളുകളെ മാറ്റിപ്പാര്‍പ്പിച്ചു, അക്രമബാധിത പ്രദേശത്ത് അധിക സൈന്യത്തെ വിന്യസിച്ചു, നൂറുകണക്കിന് പേര്‍ക്ക് പരിക്കേറ്റു, നിരവധി വീടുകളും വസ്തുവകകളും നശിപ്പിച്ചിട്ടുണ്ട്.
Discussion about this post