ന്യൂദല്ഹി: രാഷ്ട്രപതിയുടെ ജാതി പറഞ്ഞ് ആരോപണങ്ങള് ഉന്നയിച്ചതിന് ദല്ഹി മുഖ്യമന്ത്രി അരവിന്ദ് കേജ്രിവാള്, കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ തുടങ്ങിയവര്ക്കെതിരെ പരാതി. പുതിയ പാര്ലമെന്റ് മന്ദിരത്തിന്റെ ഉദ്ഘാടന ചടങ്ങില് രാഷ്ട്രപതി ദ്രൗപദി മുര്മുവിനെ ഒഴിവാക്കിയെന്ന് പറഞ്ഞാണ് ഈ നേതാക്കള് ജാതിവിവേചനം എന്ന ആരോപണം ഉന്നയിച്ചത്. സുപ്രീം കോടതി അഭിഭാഷകനായ വിനീത് ജിന്ഡാലാണ് ദല്ഹി പോലീസ് കമ്മിഷണര്ക്ക് പരാതി നല്കിയത്.
തങ്ങളുടെ രാഷ്ട്രീയ ലക്ഷ്യത്തിനായി കേന്ദ്രസര്ക്കാരില് അവിശ്വാസം സൃഷ്ടിക്കാന് ശ്രമിക്കുകയും ജാതി വിഭാഗങ്ങളെ പ്രകോപിപ്പിച്ച് ശത്രുത വളര്ത്തുകയുമാണ് ഈ നേതാക്കള് ചെയ്തതെന്ന് വിനീത് ജിന്ഡാല് പരാതിയില് ചൂണ്ടിക്കാട്ടി. ബഹുമാനപ്പെട്ട രാഷ്ട്രപതിയുടെ ജാതി പരാമര്ശിച്ചുകൊണ്ടുള്ള ഖാര്ഗെയുടെയും കേജ്രിവാളിന്റെയും പ്രസ്താവനകള് മനഃപൂര്വം ആസൂത്രിതവുമാണ്. ഈ പ്രസ്താവനകള് വാര്ത്തകളിലും സോഷ്യല് മീഡിയകളിലും വ്യാപകമായി പ്രസിദ്ധീകരിക്കുകയും പ്രചരിപ്പിക്കുകയും ചെയ്തുവെന്ന് പരാതിയില് കൂട്ടിച്ചേര്ത്തു.
രാഷ്ട്രീയ നേട്ടത്തിനായി ഉയര്ന്ന ഭരണഘടനാ പദവികളെ അപമാനിക്കുന്ന തലത്തിലേക്ക് നേതാക്കളെ പോകാന് അനുവദിക്കരുതെന്നും പരാതിക്കാരന് പറഞ്ഞു.
Discussion about this post