കോഴിക്കോട്: മാധ്യമങ്ങളുടെ ധര്മം നടന്ന സംഭവങ്ങളുടെ വിവരം വസ്തുതാപരമായും വളച്ചൊടിക്കാതെയും ജനങ്ങളെ അറിയിക്കുകയാണെന്ന് ഗവര്ണര് ആരിഫ് മുഹമ്മദ് ഖാന്. അത് രാഷ്ട്രീയത്തിന്റെയോ സ്ഥാപനവല്രണത്തിന്റെയോ സമ്മര്ദ്ദമില്ലാതെ ചെയ്യണം. ഏതുസാഹചര്യത്തിലും അക്ഷോഭ്യമായി, സമചിത്തതയോടെ അത് നിര്വഹിക്കണം. വളച്ചൊടിക്കലും തെറ്റിദ്ധരിപ്പിക്കലും ഒഴിവാക്കണം. നാരദ മഹര്ഷി പറഞ്ഞിട്ടുണ്ട്, ‘സര്വഭൂതങ്ങള്ക്കും ഹിതകരമായി സത്യം പറയണ’മെന്ന്, ഗവര്ണര് പറഞ്ഞു.കേസരി വാരികയുടെ 71 ാം ജന്മവാര്ഷിക ആഘോഷങ്ങളും മാധ്യമ സെമിനാറും കേസരിഭവനില് ഉദ്ഘാടനം ചെയ്യുകയായിരുന്നു ഗവര്ണര്. എന്നാല് ഭാരതം വിശ്വഗുരു എന്ന സ്ഥാനത്തേക്ക് കുതിക്കുന്ന വേളയിലും ഇന്ത്യയിലെ മാധ്യമങ്ങള് പലതും കൊളോണിയല് ഹാങ്ഓവര് ഉള്ളവയാണെന്നും ഗവര്ണര് പറഞ്ഞു.
മഹാഭാരതത്തിലെ സഞ്ജയന് ആദ്യത്തെ തത്സമയ റിപ്പോര്ട്ടറാണ്. യുദ്ധത്തില് ഒരുപക്ഷത്തുള്ളയാളിന്റെ അച്ഛനായ ധൃതരാഷ്ട്രര്ക്കുവേണ്ടി വസ്തതുതകള് വിവരിച്ചപ്പോഴും ഒരിക്കലും ഭരണാധികാരിയായ രാജാവിനെ പ്രീതിപ്പെടുത്താന് അസത്യം പറയാനോ വസ്തുത ഒളിച്ചുവെക്കാനോ വേദനാകരമായ കാര്യം പറയാതിരിക്കാനോ സഞ്ജയന് ശ്രമിച്ചില്ല. സഞ്ജയന് ഒരു വ്യക്തിയല്ല ധര്മമാണെനും തിരിച്ചറിയണം, ഗവര്ണര് വിശദീകരിച്ചു.
ഇന്ത്യന് സാഹചര്യത്തില് സ്വതന്ത്ര മാധ്യമ പ്രവര്ത്തനമാണ് ജനാധിപത്യത്തിന്റെ ജീവനാഡി. പക്ഷേ ഒരു വിഭാഗം മാധ്യമങ്ങള് രാഷ്ട്രീയപാര്ട്ടികളുടെയും മറ്റുചില ഗ്രൂപ്പുകളുടെയും ദേശവിരുദ്ധമായ താല്പര്യങ്ങള്ക്ക് വശംവദരാകുന്നു, അതിന് പ്രതിഫലം വാങ്ങി വാര്ത്തകൊടുക്കുന്ന പ്രവണതകൂടിയാകുമ്പോള് അപകടമാകുന്നു. അവര്ക്കും തിരുത്തലായി പ്രവര്ത്തിക്കുന്നതിലാണ് കേസരിയുടെ മഹത്വം,
സര്ക്കാരിന്റെ അധികാര പരിധിയിലുള്ള നയത്തിലോ നടപടിയിലോ ഇടപ്പെട്ട ഒരു കാര്യമെങ്കിലും ആരെങ്കിലും തെളിയിച്ചാല് ആ നിമിഷം സ്ഥാനമൊഴിയുമെന്ന് ഗവര്ണര് ആരിഫ് മുഹമ്മദ് ഖാന്. അതേസമയം, ഭരണഘടന പ്രകാരം നിര്വചിച്ച് വേര്തിരിച്ചിട്ടുള്ള ഗവര്ണറുടെ കര്ത്തവ്യങ്ങളില് സംസ്ഥാന സര്ക്കാര് ഇടപെട്ടിട്ടുണ്ടെന്ന് അദ്ദേഹം ആവര്ത്തിച്ച് വിശദീകരിച്ചു. പക്ഷേ, ഭാഗ്യത്തിന്, ഹൈക്കോടതിയുടെയും സുപ്രീം കോടതിയുടെയും വിധികള്വഴി സര്വകലാശാലകള്ക്ക് സ്വയംഭരണം തിരിച്ചുകിട്ടുമെന്നും വിധികള് പ്രതീക്ഷയുടെ വെളിച്ചമാണെന്നും ഗവര്ണര് പറഞ്ഞു. ഗവര്ണര് എന്ന നിലയില് എന്തെങ്കിലും പുതുതായി ചെയ്യുകയായിരുന്നില്ല, മറിച്ച് നഷ്ടമാക്കിയ ഉത്തരവാദിത്തങ്ങള് വീണ്ടെടുക്കുകയാണ് ചെയ്തതെന്നും അദ്ദേഹം പറഞ്ഞു.
ഹിന്ദുസ്ഥാന് പ്രകാശന് ട്രസ്റ്റ് മാനേജിങ് ട്രസ്റ്റി അഡ്വ. പി.കെ. ശ്രീകുമാര് അധ്യക്ഷത വഹിച്ചു. മുന് അംബാസിഡര് ഡോ. ടി.പി. ശ്രീനിവാസന്, എന്ഐടി കാലിക്കറ്റ് ഡയറക്ടര് പ്രൊഫ. പ്രസാദ് കൃഷ്ണ എന്നിവര് ആശംസയര്പ്പിച്ചു. പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര് സംബന്ധിച്ചു.
മാഗ്കോം ഉദ്ഘാടനം ചെയ്തു
കോഴിക്കോട്: പത്രപ്രവര്ത്തക പരിശീലന സ്ഥാപനമായ മഹാത്മാഗാന്ധി കോളജ് ഓഫ് മാസ് കമ്മ്യൂണിക്കേഷന് (മാഗ്കോം) മുന് അംബാസിഡര് ഡോ. ടി.പി. ശ്രീനിവാസന് ഉദ്ഘാടനം ചെയ്തു. ‘മാറുന്ന കാലത്തെ മാധ്യമ നൈതികത’ എന്ന വിഷയത്തില് തുടര്ന്നു നടന്ന സെമിനാറില് പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര്, മാതൃഭൂമി ചാനല് മുന് പ്രോഗ്രാം തലവന് എം.പി. സുരേന്ദ്രന് എന്നിവര് സംസാരിച്ചു. എന്ഐടി കാലിക്കറ്റ് ഡയറക്ടര് പ്രൊഫ. പ്രസാദ് കൃഷ്ണ അധ്യക്ഷനായി. കേസരി വാരിക മുഖ്യപത്രാധിപര് ഡോ. എന്.ആര്. മധു ആമുഖഭാഷണം നടത്തി. ഹരികൃഷ്ണന് ഹരിദാസ് നന്ദി പറഞ്ഞു.
Discussion about this post