ധര്മ്മശാല(ഹിമാചല് പ്രദേശ്): ശക്തവും ഒരുമയുള്ളതുമായ സമാജ സൃഷ്ടിക്കായുള്ള പ്രവര്ത്തനം ഇനിയും തുടരേണ്ടതുണ്ടെന്ന് ആര്എസ്എസ് സര്കാര്യവാഹ് ദത്താത്രേയ ഹൊസബാളെ. സംഘം ആ പ്രവര്ത്തനത്തിലാണ് ശ്രദ്ധയൂന്നുന്നത്. നമ്മളൊന്നാണെന്ന മനോഭാവം എല്ലാവരിലും ഉറയ്ക്കുമ്പോള് മാത്രമേ സാമാജിക സമരസത യാഥാര്ത്ഥ്യമാവൂ എന്ന് അദ്ദേഹം പറഞ്ഞു. സംഘശതാബ്ദിയുടെ ഭാഗമായി ആര്എസ്എസ് കാംഗ്ര ജില്ല സംഘടിപ്പിച്ച പൗരപ്രമുഖരുടെ സമ്മേളനത്തെ അഭിസംബോധന ചെയ്യുകയായിരുന്നു സര്കാര്യവാഹ്.
നൂറ് വര്ഷത്തെ സംഘയാത്ര സേവനത്തിന്റെയും സമര്പ്പണത്തിന്റെയും മനോഭാവത്തോടെ രാഷ്ട്രനിര്മാണ പ്രക്രിയയിലേക്കുള്ള ചുവടുവയ്പായിരുന്നു. ആര്എസ്എസിന്റെ ശാഖകള് ദേശസ്നേഹത്താല് പ്രേരിതരായ വ്യക്തികളെയും സമൂഹ ക്ഷേമത്തിനായി പ്രവര്ത്തിക്കുന്നവരെയും സൃഷ്ടിക്കുന്നു. ആ പ്രവര്ത്തനം സംഘം തുടരുകയാണെന്ന് അദ്ദേഹം ചൂണ്ടിക്കാട്ടി.
സമാജ പുരോഗതിക്ക് സംഘടിക്കുകയും ഒരുമിച്ച് പരിശ്രമിക്കുകയും ആ പരിശ്രമത്തില് എല്ലാവരെയും ഒപ്പം കൂട്ടുകയും വേണം. രാജ്യത്തിന്റെ സമഗ്ര വികസനത്തിന് എല്ലാവരുടെയും സംഭാവനകള് ആവശ്യമാണ്. അതിന് എല്ലാത്തരം വിവേചനങ്ങളും ഇല്ലാതായേ മതിയാകൂ. സംഘം കേവലം സംഘടനയല്ല, അതൊരു ദേശീയമുന്നേറ്റമാണ്, ഒരു ജീവിതരീതിയുമാണ്. ഇന്ന് ലോകത്തിലെ മുന്നിര രാജ്യങ്ങളില് ഒന്നാണ് ഭാരതം. നമ്മള് ലോകത്തിന് ഒരു ജീവിതരീതി കാണിച്ചുകൊടുക്കുന്നു. മറ്റ് രാജ്യങ്ങള് നമ്മളെ പിന്തുടരുന്നു. അതുകൊണ്ടുതന്നെ ശക്തവും ഒരുമയുള്ളതുമായ സമൂഹമായിരിക്കേണ്ടത് നമ്മുടെ ഉത്തരവാദിത്തമാണ്, ദത്താത്രേയ ഹൊസബാളെ പറഞ്ഞു.
പ്രാന്ത സംഘചാലക് ഡോ. വീര് സിംഗ് രംഗഡ, സഹപ്രാന്ത സംഘചാലക് അശോക് ശര്മ്മ, വിഭാഗ് സംഘചാലക് ഭൂഷണ് റെയ്ന, ജില്ലാ സംഘചാലക് പ്രദീപ് കുമാര് എന്നിവരും വേദിയില് സന്നിഹിതരായിരുന്നു.
Discussion about this post