ന്യൂദൽഹി : പരീക്ഷാ മാഫിയയ്ക്കെതിരെ ഭാരത സർക്കാർ സ്വീകരിച്ച നിർണായക നടപടിയെ സ്വാഗതം ചെയ്ത് എബിവിപി. ഫാസ്റ്റ് ട്രാക്ക് കോടതികൾ സ്ഥാപിക്കൽ, പ്രധാനപ്പെട്ട ഭരണപരമായ മാറ്റങ്ങൾ കൊണ്ടുവരൽ, പരീക്ഷാ സമ്പ്രദായത്തിന്റെ സുതാര്യതയും വിശ്വാസ്യതയും തിരികെ കൊണ്ടുവരാൻ കർശന നടപടികളും സുരക്ഷിതത്വവും ഉറപ്പുനൽകുന്ന പ്രധാനമന്ത്രിയുടെ പ്രഖ്യാപനം എന്നിവ സമയോചിതവും സ്വാഗതാർഹവുമാണെന്ന് സംഘടന പത്രകുറിപ്പിൽ അറിയിച്ചു.
കൂടാതെ ഈ ഉറപ്പുകളെത്തുടർന്ന്, 26 ദിവസത്തെ നിരാഹാര സമരം അവസാനിപ്പിക്കാനുള്ള സോനം വാങ്ചുകിന്റെ തീരുമാനം ചർച്ചകളിലൂടെയുള്ള പരിഹാരത്തിലേക്കുള്ള നല്ലൊരു ചുവടുവെയ്പ്പാണ്. അദ്ദേഹത്തിന് നല്ല ആരോഗ്യവും വേഗത്തിലുള്ള സുഖം പ്രാപിക്കലും ആശംസിക്കുന്നുവെന്നും സംഘടന പത്രക്കുറിപ്പിൽ അറിയിച്ചു.
ചോദ്യപേപ്പർ ചോർച്ച പോലുള്ള ഗുരുതരമായ പ്രശ്നങ്ങൾ തടയുന്നതിനും പരീക്ഷാ രീതിയിൽ സുതാര്യതയും ഉത്തരവാദിത്തവും പുനഃസ്ഥാപിക്കുന്നതിനുമായി സമഗ്രമായ ഘടനാപരമായ മാറ്റങ്ങൾ എബിവിപി തുടർച്ചയായി ആവശ്യപ്പെടുന്നുണ്ട്. പരീക്ഷാ മാഫിയയ്ക്കെതിരെ വേഗത്തിലുള്ള നടപടികൾക്കായി ഫാസ്റ്റ് ട്രാക്ക് കോടതികൾ സ്ഥാപിക്കുക, വിശ്വാസ്യത വളർത്തുന്നതിനായി ഭരണപരമായ പൊളിച്ചെഴുത്തുകൾ നടത്തുക, കാബിനറ്റ് തലത്തിലുള്ള നയപരമായ മാറ്റങ്ങളും കർശനമായ നിയമങ്ങളും കൊണ്ടുവരുമെന്ന ബഹുമാനപ്പെട്ട പ്രധാനമന്ത്രിയുടെ പരസ്യമായ ഉറപ്പ് എന്നിവ കാലഘട്ടത്തിന്റെ ആവശ്യാനുസൃതമുള്ള പ്രധാന നടപടികളാണ്.
ഈ തീരുമാനങ്ങൾ ദൂരവ്യാപകമായ നല്ല ഫലങ്ങൾ നൽകുമെങ്കിലും, ഭാരത സർക്കാർ ഈ മുന്നേറ്റം തുടർന്നു കൊണ്ടുപോകുമെന്ന് എബിവിപി പ്രതീക്ഷിക്കുന്നു. പ്രത്യേകിച്ചും, പരീക്ഷാ സമ്പ്രദായത്തെ തികച്ചും സുതാര്യവും ഉത്തരവാദിത്തമുള്ളതും വിദ്യാർത്ഥികേന്ദ്രീകൃതവുമാക്കാൻ നിർദ്ദിഷ്ട സമയപരിധിക്കുള്ളിൽ ശുപാർശകൾ നൽകുന്നതിനായി സർക്കാർ ഒരു ഉന്നതതല സമിതി രൂപീകരിക്കണമെന്നും എബിവിപി ദേശീയ ജനറൽ സെക്രട്ടറി ഡോ. വീരേന്ദ്ര സിംഗ് സോളങ്കി പറഞ്ഞു
“ഫാസ്റ്റ് ട്രാക്ക് കോടതികൾ സ്ഥാപിക്കൽ, ഭരണപരമായ പുനഃസംഘടന, പരീക്ഷകളുടെ നിഷ്പക്ഷത സംരക്ഷിക്കുന്നതിനുള്ള പ്രധാനമന്ത്രിയുടെ ദൃഢമായ പ്രതിബദ്ധത എന്നിവ നിർണായകവും യഥാസമയമുള്ളതുമായ ഇടപെടലുകളാണ്. ഈ സംഭവവികാസങ്ങളുടെ പശ്ചാത്തലത്തിൽ, സോനം വാങ്ചുക് നിരാഹാര സമരം അവസാനിപ്പിച്ചത് വിദ്യാർത്ഥികളുടെ മികച്ച താല്പര്യങ്ങൾ മുൻനിർത്തിയുള്ള ചർച്ചകൾക്കും പരിഹാരത്തിനും വഴിയൊരുക്കുന്ന പോസിറ്റീവായൊരു ചുവടുവെയ്പ്പാണ്. മുന്നോട്ട് പോകുമ്പോൾ, കൂടുതൽ ആഴത്തിലുള്ള ഘടനാപരമായ പരിഷ്കാരങ്ങളിലൂടെ ഈ നടപടികൾ നിലനിർത്തേണ്ടതുണ്ട്. രാജ്യത്തെ ഓരോ വിദ്യാർത്ഥിക്കും സുതാര്യവും വിശ്വാസയോഗ്യവും ഉത്തരവാദിത്തമുള്ളതുമായ ഒരു പരീക്ഷാ സമ്പ്രദായം ഉറപ്പാക്കിക്കൊണ്ട്, സമയബന്ധിതമായി ആവശ്യമായ പരിഷ്കാരങ്ങൾ നടപ്പിലാക്കാൻ എബിവിപിയുടെ ആവശ്യപ്രകാരം ഒരു ഉന്നതതല സമിതി രൂപീകരിക്കണം.”- അദ്ദേഹം പറഞ്ഞു.
Discussion about this post