വൃന്ദാവനം (മഥുര): ആദര്ശരാഷ്ട്രത്തെ നിര്മിക്കുന്നതിനുള്ള പ്രഥമ ഘടകം സദ്ഗുണസമ്പന്നമായ സമാജമാണെന്ന് ആര്എസ്എസ് സര്സംഘചാലക് ഡോ. മോഹന് ഭാഗവത്. ജനാധിപത്യത്തിന്റെ ചട്ടക്കൂട്ടില് പ്രവര്ത്തിക്കേണ്ടത് നല്ല ആളുകളാണ്. അത്തരക്കാര്ക്ക് ഭരണസംവിധാനങ്ങളില് സ്ഥാനമുണ്ടാകണമെങ്കില് അവരെ തെരഞ്ഞെടുക്കുന്ന ജനങ്ങളും സദ്ഗുണങ്ങളുള്ളവരാകണം. നല്ല ആളുകള് എന്നതുകൊണ്ട് ഒരു പ്രത്യേക പാര്ട്ടിയെയോ വ്യക്തിയെയോ അല്ല പരാമര്ശിക്കുന്നില്ല; മറിച്ച്, യഥാര്ത്ഥത്തില് നല്ലവരെക്കുറിച്ചാണ്. കാരണം നല്ലവര് എപ്പോഴും നല്ലതേ ചെയ്യൂ, അദ്ദേഹം പറഞ്ഞു. സന്ത് ശ്രീമദ് ജഗദ്ഗുരു ദ്വാരാചാര്യ ശ്രീ മലൂക് ദാസ് മഹാരാജിന്റെ 452-ാം ജന്മവാര്ഷികത്തോടനുബന്ധിച്ച് സംഘടിപ്പിച്ച സംന്യാസി സമ്മേളനത്തില് സംസാരിക്കുകയായിരുന്നു സര്സംഘചാലക്.നമ്മുടെ പ്രതിനിധികളെ തെരഞ്ഞെടുക്കുന്നത് നമ്മള് തന്നെയാണ്. നമ്മള് അഴിമതിക്കാരാണെങ്കില്, പ്രതിനിധികളും അഴിമതിക്കാരായിരിക്കും. അതുകൊണ്ട് നമ്മള് നന്മയുള്ളവരായി മാറിയാല് സജ്ജനങ്ങള് ഉന്നതസ്ഥാനങ്ങളിലെത്തുന്നത് തടയാന് ആര്ക്കും കഴിയില്ല.
സമൂഹത്തില് ഗോസംരക്ഷണത്തെക്കുറിച്ച് വലിയ ചര്ച്ചകളുണ്ട്. ഭരണകൂടമോ നിയമങ്ങളോ കൊണ്ടുമാത്രം പ്രശ്നങ്ങള് പരിഹരിക്കപ്പെടില്ല. റെഡ് സിഗ്നലിന് വിലയുണ്ടാകുന്നത് ജനങ്ങള് അത് അനുസരിക്കുമ്പോള് മാത്രമാണ്. അതുകൊണ്ട് യഥാര്ത്ഥ ശക്തി ഭരണസംവിധാനത്തിലല്ല, ജനങ്ങളിലാണ്. അധികാരത്തിലിരിക്കുന്നവര്ക്ക് ഗോസംരക്ഷണം വേണമെന്ന് ആഗ്രഹം ഉണ്ട്. അതിനുവേണ്ടി ധീരമായ നടപടികള് കൈക്കൊള്ളുന്നതിനുമുമ്പ്, ഈ വിഷയത്തില് സമൂഹത്തിനുള്ളില് വിശാലമായ ഒരു സമവായം ഉണ്ടാകണം. പൊതുജന അവബോധം വളര്ത്തുകയാണ് വേണ്ടത്. സമൂഹം പശുക്കളെക്കുറിച്ച് ആദരവുള്ളവരായാല് ഗോവധം സ്വയം ഇല്ലാതാകും, മോഹന് ഭാഗവത് പറഞ്ഞു.
ഗോമാതാവ് എന്ന പദമുയര്ത്തുന്ന വൈകാരിക ഭാവത്തിനപ്പുറം ശാസ്ത്രീയമായി അതിന്റെ പ്രാധാന്യം എത്രയെന്ന് സ്ഥാപിക്കാന് നമുക്ക് കഴിയണം. നാടന് പശു ഭാരതത്തിന് മാത്രമല്ല, മുഴുവന് ലോകത്തിനും എത്രത്തോളം പ്രയോജനകരമാണെന്ന് ജനങ്ങളെ പഠിപ്പിക്കുകയും പരിശീലിപ്പിക്കുകയും വേണം. പശുവിന് പാലിന്റെ ഔഷധ ഗുണങ്ങളെക്കുറിച്ച്, പഞ്ചഗവ്യത്തിന്റെ സവിശേഷതകളെക്കുറിച്ച്, കാര്ഷിക മേഖലയില് അതിന്റെ പ്രയോജനങ്ങളെക്കുറിച്ചൊക്കെ ജനങ്ങള്ക്കിടയില് അവബോധമുണ്ടാക്കുകയും അവരെ ഈ മേഖലയില് പരിശീലിപ്പിക്കുകയും വേണം. ശാസ്ത്രീയ വസ്തുതകളുടെ അടിസ്ഥാനത്തില് സമൂഹത്തില് ഇത്തരം ധാരണ ബലപ്പെട്ടാല് ഗോസംരക്ഷണം ഭാരതത്തിന്റെയാകെ ഇച്ഛാശക്തിയാല് സാധ്യമാകും, സര്സംഘചാലക് പറഞ്ഞു.
ധര്മ്മത്തിന്റെ പാതയാണ് സംന്യാസി സമൂഹം കാട്ടിത്തരുന്നതെന്ന് അദ്ദേഹം ചൂണ്ടിക്കാട്ടി. എന്നാല് ആ പാതയില് സഞ്ചരിക്കണമെങ്കില് അവനവനിലെ അഹങ്കാരത്തെ കീഴടക്കണം. സത്യം, കാരുണ്യം, പരിശുദ്ധി, തപസ്സ് എന്നീ നാല് തൂണുകളിലാണ് ധര്മ്മം നിലകൊള്ളുന്നത്. കാരുണ്യമില്ലാതെ, ധര്മ്മം എന്ന ആശയം തന്നെ അചിന്തനീയമാണ്. സൃഷ്ടി അതിന്റെ ഗതി തുടരണമെങ്കില്, നാമെല്ലാവരും ഒരുമിച്ച് ഐക്യത്തോടെ ജീവിക്കണമെന്നതാണ് ധര്മ്മത്തിന്റെ അടിസ്ഥാന സത്ത.ഒരു വ്യക്തിയുടെ ജീവിതം ശുദ്ധവും അഹങ്കാരമുക്തവുമാകുമ്പോഴാണ് അവനില് കാരുണ്യം ജനിക്കുന്നത്. അഹങ്കാരം ഉപേക്ഷിക്കുമ്പോള്, സ്വാഭാവികമായും ഞാനും എന്റേതും എന്ന വികാരത്തില് നിന്ന് ഞാനല്ല, നീ എന്ന ഭാവത്തിലേക്ക് നമ്മള് മാറും. അപ്പോള് മാത്രമേ ഈ ലോകത്തിലെ എല്ലാവരുടെയും കഷ്ടപ്പാട് നമ്മുടെ സ്വന്തം കഷ്ടപ്പാടായി നാമേറ്റെടുക്കുകയുള്ളൂ. ഭാരതം ഈ പ്രപഞ്ചത്തിന്റെ ആത്മാവാണ്. നമ്മുടെ രാഷ്ട്രം പരമവൈഭവത്തിലെത്തിയാല് മാത്രമേ ലോകത്തില് സമൃദ്ധിയും സന്തോഷവും സമാധാനവും നിലനില്ക്കൂ, അദ്ദേഹം പറഞ്ഞു.
Discussion about this post