കരുനാഗപ്പള്ളി: വള്ളിക്കാവ് അമൃത എഞ്ചിനീയറിങ് കോളജില് രണ്ട് ദിവസമായി നടന്നുവന്ന ഭാരതീയ വിദ്യാനികേതന് സംസ്ഥാന പ്രതിനിധി സഭ സമാപിച്ചു. കേരളത്തിലെ ഭാരതീയ വിദ്യാനികേതന് വിദ്യാലയങ്ങളിലെ മാനേജ്മെന്റ് പ്രതിനിധികള്, സംസ്ഥാന, ജില്ലാ ഭാരവാഹികള് ഉള്പ്പടെ 500 ഓളം പേര് പ്രതിനിധി സഭയില് പങ്കെടുത്തു.
രാഷ്ട്ര പരിവര്ത്തന പ്രവര്ത്തനമാണ് വിദ്യാഭ്യാസരംഗത്ത് വിദ്യാനികേതന് നിര്വഹിച്ചു വരുന്നതെന്ന് സമാപന സമ്മേളനത്തില് അധ്യക്ഷത വഹിച്ച് സംസ്ഥാന പ്രസിഡന്റ് പി. ഗോപാലന്കുട്ടി മാസ്റ്റര് പറഞ്ഞു. ഭാരതീയ വിജ്ഞാനത്തേയും, ചിന്തയേയും കൈനീട്ടി സ്വീകരിക്കാന് ഒരുങ്ങിനില്ക്കുന്ന കാലഘട്ടത്തില് ഭാരതീയ വിദ്യാനികേതന്റെ ദൗത്യം മഹത്വപൂര്ണമാണ്. അത് പൂര്ത്തീകരിക്കാന് കഴിയണം. അതിനുവേണ്ടിയുള്ള പ്രവര്ത്തനമാണ് കഴിഞ്ഞ 50 വര്ഷമായി വിദ്യാനികേതന് ചെയ്തുവരുന്നതെന്നും അദ്ദേഹം പറഞ്ഞു.
ശ്രേഷ്ഠമായ ലക്ഷ്യത്തിനു വേണ്ടി പ്രവര്ത്തിക്കുന്ന സംഘടനയില് പ്രവര്ത്തിക്കുന്നവര് ജീവിതം കൊണ്ടും, ആചരണം കൊണ്ടും മാതൃകയായി മാറണമെന്നും അത് സംഘടനയ്ക്കും, സമൂഹത്തിനും, രാഷ്ട്രത്തിനും ഗുണകരമായ മാറ്റമാണ് ഉണ്ടാക്കുന്നതെന്നും സമാപന ഭാഷണത്തില് സംസ്ഥാന സംഘടനാ സെക്രട്ടറി ആര്. അനീഷ് കുമാര് പറഞ്ഞു.
വിവിധ സെഷനുകളില് ശ്രീകാന്ത് ഗുരുപദം (സംസ്ഥാന സെക്രട്ടറി), എന്. രാധാകൃഷ്ണന് (ജനറല് സെക്രട്ടറി), എന്.സി.ടി. രാജഗോപാല് (ക്ഷേത്രീയ കാര്യദര്ശി), കെ.ആര്. രജി (സെക്രട്ടറി) എന്നിവര് സംസാരിച്ചു.
ഭാരതീയ വിദ്യാനികേതന്റെ 2026-27 വര്ഷത്തെ സംസ്ഥാന ഭാരവാഹികളായി പി. ഗോപാലന്കുട്ടി മാസ്റ്റര് (പ്രസിഡന്റ്), വൈസ് പ്രസിഡന്റുമാരായി എം. വേണുഗോപാല്, ആര്. ചന്ദ്രശേഖരന്, ആര്.വി. ജയകുമാര്, എം.എസ്. ലളിതാംബിക, രാജലക്ഷ്മി എം., എന്. രാധാകൃഷ്ണന് (ജനറല് സെക്രട്ടറി), ആര്. അനീഷ് കുമാര് (ഓര്ഗനൈസിങ് സെക്രട്ടറി), സെക്രട്ടറിമാരായി കെ.ആര്. റജി, എം. ബാലസുബ്രഹ്മണ്യന്, സി.ടി. ശ്രീകാന്ത്, കെ.എം. പ്രമോദ് കുമാര്, സൗമ്യ ഇ., പി. ഗണേശന്, അരുണ് എ. (ട്രഷറര്) എന്നിവരെ തെരഞ്ഞെടുത്തു.
Discussion about this post