ബെംഗളൂരു: രാഷ്ട്രസേവികാ സമിതി മുന് അഖില ഭാരതീയ സഹകാര്യവാഹിക കെ. രുഗ്മിണി അക്ക അന്തരിച്ചു. 98 വയസായിരുന്നു. ആര്എസ്എസ് മുന് അഖിലഭാരതീയ സേവാപ്രമുഖ് സ്വര്ഗീയ കെ. സൂര്യനാരായണറാവുവിന്റെയും മുതിര്ന്ന പ്രചാരകും അഖില ഭാരതീയ ശൈക്ഷിക് മഹാസംഘ് അധ്യക്ഷനുമായിരുന്ന സ്വര്ഗീയ കെ. നരഹരിജിയുടെയും സഹോദരിയാണ്. ബെംഗളൂരു നാഗപ്പ ബ്ലോക്കില് ചൈതന്യയില് കൃഷ്ണപ്പയുടെയും സുന്ദരമ്മയുടെയും മകളാണ് കെ. രുഗ്മിണി. ജീവിതം രാഷ്ട്രസേവനത്തിനായി സമര്പ്പിച്ച ഒരു മാതൃകാ കുടുംബമാണ് രുഗ്മിണി അക്കയുടേതെന്നും മാതൃസമാന വാത്സല്യമാണ് പ്രവര്ത്തകര്ക്ക് അവര് പകര്ന്നുനല്കിയതെന്നും ആര്എസ്എസ് സര്സംഘചാലക് ഡോ. മോഹന് ഭാഗവതും സര്കാര്യവാഹ് ദത്താത്രേയ ഹൊസബാളെയും അനുസ്മരണസന്ദേശത്തില് ചൂണ്ടിക്കാട്ടി.
വിയോഗം വാര്ധക്യത്തില് സ്വാഭാവികമാണ്. എന്നാല് ദശകങ്ങള് പിന്നിട്ട ഊര്ജ്ജ്വസ്വലമായ പ്രവര്ത്തനവും സ്നേഹവാത്സല്യങ്ങളും മൂലം രുഗ്മിണിഅക്കയുടെ വിയോഗം അസഹനീയമായ വേദനയാണ് സൃഷ്ടിക്കുന്നത് രാഷ്ട്രസേവികാസമിതിയിലൂടെ ഹിന്ദുസമാജത്തെ സംഘടിപ്പിക്കുകയും തലമുറകളിലേക്ക് സംസ്കാരം പകരുകയും ചെയ്ത മഹത് സാന്നിധ്യമാണ് ഇല്ലാതായതെന്ന് അനുസ്മരണ സന്ദേശം ചൂണ്ടിക്കാട്ടി.
രാഷ്ട്രസേവികാസമിതി പ്രമുഖ് സഞ്ചാലിക വി. ശാന്തകുമാരി, കാര്യവാഹിക സീതാഗായത്രി അന്നദാനം, ദല്ഹി മുഖ്യമന്ത്രി രേഖാ ഗുപ്ത തുടങ്ങി നിരവധി പ്രമുഖര് രുഗ്മിണി അക്കയ്ക്ക് ശ്രദ്ധാഞ്ജലി അര്പ്പിച്ചു.
Discussion about this post