ബിഷ്കെക്ക്(കിര്ഗിസ്ഥാന്): മഹാഭാരത പഠനം മുന്നിര്ത്തി ഇന്റര്നാഷണല് സിവലൈസേഷണല് സ്റ്റഡി സെന്ററിന് കിര്ഗിസ്ഥാനില് തുടക്കം. കിര്ഗിസ് ഇതിഹാസമായ മനാസും മഹാഭാരതവും മുന്നോട്ടുവയ്ക്കുന്ന സാംസ്കാരിക ജീവിത മൂല്യങ്ങളാണ് പ്രധാന പഠനവിഷയം. ന്യൂദല്ഹി സെന്റര് ഫോര് സ്റ്റഡീസ് ഓഫ് ഇന്റര്നാഷണല് റിലേഷന്സിന്റെ സഹകരണത്തോടെ മനാസ് നാഷണല് അക്കാദമിയാണ് കേന്ദ്രം സ്ഥാപിച്ചത്. ബിഷ്കെക്കില് നടന്ന ഉദ്ഘാടന പരിപാടിയില് ആര്എസ്എസ് അഖില ഭാരതീയ പ്രചാര് പ്രമുഖ് സുനില് ആംബേക്കര് മുഖ്യതിഥിയായി.
ഭാരതത്തിലെയും കിര്ഗിസ്ഥാനിലെയും ജനങ്ങള് തമ്മിലുള്ള ദീര്ഘകാല സാംസ്കാരിക ബന്ധങ്ങളുടെ അടയാളപ്പെടുത്തലാണ് പഠനകേന്ദ്രമെന്ന് സുനില് ആംബേക്കര് പറഞ്ഞു. ഭാരതീയ സംസ്കാരത്തില് മഹാഭാരതം അഗാധമായ സ്വാധീനം ചെലുത്തിയതുപോലെ മനാസ് സഹസ്രാബ്ദങ്ങളായി കിര്ഗിസ് ജനതയുടെ കരുത്താണെന്ന് അദ്ദേഹം ചൂണ്ടിക്കാട്ടി. മനാസിന്റെ ഹിന്ദി വിവര്ത്തനവും പരിപാടിയില് പ്രകാശനം ചെയ്തു. ഇന്ത്യ-സെന്ട്രല് ഏഷ്യ ഫൗണ്ടേഷന്റെ ചെയര്മാന് പ്രൊഫ. രമാകാന്ത് ദ്വിവേദി, ജവഹര്ലാല് നെഹ്റു സര്വകലാശാലയിലെ റഷ്യന് ഭാഷാ സാഹിത്യ കേന്ദ്രം മുന് ഡയറക്ടര് പ്രൊഫ. ഹേമചന്ദ്ര പാണ്ഡെ എന്നിവരാണ് വിവര്ത്തകര്. നാഷണല് അക്കാദമി ഓഫ് മനാസ് പ്രസിഡന്റ് പ്രൊഫ നസീറ ആലി കിസി, ഗുല്സാത്ത് എന്നിവരുടെ ശ്രമഫലമാണ് ഈ പഠനകേന്ദ്രമെന്ന് സുനില് ആംബേക്കര് ചൂണ്ടിക്കാട്ടി.
കിര്ഗിസ് റിപ്പബ്ലിക്കിന്റെ ശാസ്ത്ര, ഉന്നത വിദ്യാഭ്യാസ, വകുപ്പ് ഉപമന്ത്രി ദുരുസ്ബെക്ക് കൊസുവേവ്, സാംസ്കാരിക, കായിക, യുവജന നയ ഉപമന്ത്രി സാല്കിന് സര്നോഗോവ, ഭാരതത്തിന്റെ അംബാസഡര് അംബാസഡര് ബിരേന്ദര് സിങ് യാദവ്, സിഎസ്ഐആര് ഓണററി ഡയറക്ടര് ഡോ. പുനിത് ഗൗര് എന്നിവര് പരിപാടിയില് സംസാരിച്ചു.
