ലണ്ടന്: സംഘശതാബ്ദിയുടെ ഭാഗമായുള്ള ആഗോള സമ്പര്ക്കത്തിന്റെ ഭാഗമായി ലണ്ടനില് നാളെ സെലിബ്രേഷന് ഓഫ് വണ്നസ് (ഏകതയുടെ ആഘോഷം) നടക്കും. സര്സംഘചാലക് ഡോ, മോഹന് ഭാഗവത് പങ്കെടുക്കുന്ന പരിപാടി 1966 മുതല് യുകെയില് പ്രവര്ത്തിക്കുന്ന ഹിന്ദു സ്വയംസേവക് സംഘ് യുകെയാണ് മുന്നൂറിലേറെ സാമൂഹ്യ സംഘടനകളുടെ പിന്തുണയോടെ സംഘടിപ്പിക്കുന്നതെന്ന് ആര്എസ്എസ് അഖില ഭാരതീയ പ്രചാര് പ്രമുഖ് സുനില് ആംബേക്കര് വാര്ത്താസമ്മേളനത്തില് അറിയിച്ചു. സാമൂഹ്യ സാംസ്ക്കാരിക സംഘടനകളുടെ പൊതുവേദിയായ ഇന്റഗ്രല് ആണ് പരിപാടിയുടെ സംയോജകര്.
ഈ മാസം രണ്ടിന് യുകെയില് എത്തിയ സര്സംഘചാലക് ഡോ. മോഹന് ഭാഗവത് വിവിധ വിശ്വാസ സമൂഹങ്ങളുടെ സംഘടനാ നേതാക്കള്, അക്കാദമിക് വിദഗ്ധര്, ഗവേഷകര് മറ്റു പ്രമുഖര് എന്നിവരുമായി കൂടിക്കാഴ്ചകള് നടത്തിവരികയാണ്. വില്ലെസഡനിലെ സ്വാമി നാരായണ ക്ഷേത്രം, ഖല്സ ജാഥാ ഗുരുദ്വാര എന്നിവ സന്ദര്ശിച്ചു. ലണ്ടനിലെ ജൈനക്ഷേത്രത്തിലും അദ്ദേഹം ദര്ശനം നടത്തും.
വസുധൈവ കുടുംബകം എന്ന സന്ദേശം ലോകമെങ്ങും എത്തിക്കുന്നതിന്റെ ഭാഗമായി സര്സംഘചാലക് അമേരിക്കയിലെ മാഡിസണ് സ്ക്വയറിലും കാനഡയിലെ ടൊറന്േറായിലും നടന്ന പൊതുപരിപാടികളില് പങ്കെടുത്തിരുന്നു. മാഡിസണ് സ്ക്വയറില് നടന്ന പരിപാടിയില് ആറായിരത്തിലേറെ പ്രതിനിധികളും കാനഡയില് രണ്ടായിരത്തിലേറെ പേരും പങ്കെടുത്തിരുന്നു. ത്രിരാജ്യ സന്ദര്ശനത്തിന്റെ അവസാന ഭാഗമാണ് യുകെ സന്ദര്ശനമെന്ന് സുനില് ആംബേക്കര് ചൂണ്ടിക്കാട്ടി.
