ന്യൂദൽഹി: ന്യൂയോർക്കിൽ ആർ എസ് എസ് സർസംഘചാലക് ഡോ. മോഹൻ ഭാഗവത് പങ്കെടുക്കുന്ന ‘യൂണിവേഴ്സൽ വൺനസ് സെലിബ്രേഷൻ’ (Universal Oneness Celebration) വിവിധ മതവിഭാഗങ്ങളിലും സംസ്കാരങ്ങളിലും പെട്ടവരുമായുള്ള തുറന്ന സംവാദ വേദിയാണെന്ന് അഖില ഭാരതീയ പ്രചാർപ്രമുഖ് സുനിൽ ആംബേക്കർ. സംഭാഷണത്തിന്റെയും പരസ്പര ബഹുമാനത്തിന്റെയും അന്തരീക്ഷത്തിൽ സംഘടിപ്പിക്കപ്പെടുന്ന ഈ പരിപാടി, എല്ലാവരെയും ഉൾക്കൊള്ളുന്നതും സ്വാഗതം ചെയ്യുന്നതുമായ ഭാരതീയ മൂല്യങ്ങളെ പ്രതിഫലിപ്പിക്കുന്നതാണെന്ന് അദ്ദേഹം പറഞ്ഞു. പരസ്പര ധാരണയും പൊതുവായ ലക്ഷ്യബോധവും വളർത്തുന്നതിനായി ഭാരതത്തിലും ലോകമെമ്പാടുമുള്ള വിവിധ സമൂഹങ്ങളുമായി ആശയവിനിമയം നടത്തുന്ന ആർഎസ്എസിന്റെ ദീർഘകാല പാരമ്പര്യത്തിന് അനുസൃതമായാണ് ഈ സംരംഭം ആസൂത്രണം ചെയ്തിരിക്കുന്നത്. ആർഎസ്എസിന്റെ കാഴ്ചപ്പാടിനെക്കുറിച്ചും ആശയങ്ങളെക്കുറിച്ചും കൂടുതൽ അറിയാൻ താല്പര്യമുള്ള ആർക്കും ഈ തുറന്ന സംവാദ വേദികളിൽ പങ്കെടുക്കാവുന്നതാണെന്ന് അദ്ദേഹം പറഞ്ഞു.
