റായ് പൂര്‍ : കേന്ദ്ര-സംസ്ഥാന സര്‍ക്കാരുകളുടെ സംയുക്ത ശ്രമഫലമായി ഛത്തീസ്ഗഢിനെ നക്‌സലിസത്തിന്റെ ഭീഷണിയില്‍ നിന്ന് മോചിപ്പിക്കാന്‍ സാധിച്ചുവെന്ന് രാഷ്‌ട്രപതി ദ്രൗപദി മുര്‍മു. നക്‌സലിസത്തിന്റെ പാത ഉപേക്ഷിച്ച് സംസ്ഥാനം ഇപ്പോള്‍ പുരോഗതിയുടെ പാതയിലാണെന്നും രാഷ്‌ട്രപതി പറഞ്ഞു. ജഗ്ദല്‍പൂരിലെ ലാല്‍ബാഗ് മൈതാനത്ത് നടന്ന ‘ബസ്തര്‍ ദസറ ഉത്സവം 2026’-ല്‍ സംസാരിക്കവെ, വികസിത രാഷ്‌ട്രമെന്ന ലക്ഷ്യത്തിലേക്കുള്ള ഭാരതത്തിന്റെ യാത്രയില്‍ ഗോത്രവര്‍ഗ യുവാക്കള്‍ സജീവമായി പങ്കാളികളാകുമെന്ന് അവര്‍ പ്രത്യാശ പ്രകടിപ്പിച്ചു.
ഗോത്രവര്‍ഗ സംരംഭകര്‍ക്ക് സാമ്പത്തിക സഹായം നല്‍കുന്നതിനും അവരെ വിപണികളുമായി ബന്ധിപ്പിക്കുന്നതിനുമുള്ള ശ്രമങ്ങളെ രാഷ്‌ട്രപതി അഭിനന്ദിച്ചു. തുല്യമായ വികസനത്തിലൂടെ 2047-ഓടെ വികസിത ഇന്ത്യ കെട്ടിപ്പടുക്കുക എന്ന ലക്ഷ്യം കൈവരിക്കാന്‍ ഈ ശ്രമങ്ങള്‍ സഹായിക്കുമെന്ന് അവര്‍ പറഞ്ഞു.
പ്രകൃതിവിഭവങ്ങള്‍ ഭക്ഷണവും വെള്ളവും ജീവിതത്തിന് ആവശ്യമായ മറ്റ് ഘടകങ്ങളും നല്‍കുന്നുവെന്ന് ഓര്‍മ്മിപ്പിച്ച രാഷ്‌ട്രപതി, തങ്ങളുടെ പ്രദേശത്തെ വനങ്ങളും കുന്നുകളും സംരക്ഷിക്കാന്‍ ജനങ്ങളോട് ആഹ്വാനം ചെയ്തു. പ്രകൃതിയെ സംരക്ഷിക്കുക എന്നത് ഓരോ സമൂഹത്തിന്റെയും പ്രാഥമിക ഉത്തരവാദിത്തമായിരിക്കണമെന്ന് അവര്‍ പറഞ്ഞു.
ബസ്തര്‍ ദസറ ഉത്സവം ഈ മേഖലയിലുടനീളമുള്ള ഗോത്രവര്‍ഗ സമൂഹങ്ങളെ ഒന്നിപ്പിക്കുന്നുവെന്ന് രാഷ്‌ട്രപതി പറഞ്ഞു. ജനങ്ങള്‍ തങ്ങളുടെ ആശങ്കകളും പരാതികളും നേതാക്കളെ അറിയിക്കുന്ന പരമ്പരാഗത ‘മുരിയ ദര്‍ബാര്‍’, ജനാധിപത്യ മൂല്യങ്ങളുടെ പ്രതിഫലനമാണെന്നും അവര്‍ വിശേഷിപ്പിച്ചു. ഛത്തീസ്ഗഢില്‍ രണ്ട് ദിവസത്തെ സന്ദര്‍ശനത്തിനെത്തിയതാണ് രാഷ്‌ട്രപതി.
ലാല്‍ബാഗ് മൈതാനത്തെത്തിയ രാഷ്‌ട്രപതി, ബസ്തര്‍ ദസറ ഉത്സവവുമായി ബന്ധപ്പെട്ട വിവിധ സ്റ്റാളുകള്‍ സന്ദര്‍ശിക്കുകയും അവിടെയുണ്ടായിരുന്ന സ്‌കൂള്‍ വിദ്യാര്‍ത്ഥികളുമായി സംവദിക്കുകയും ചെയ്തു. ഛത്തീസ്ഗഢ് ഗവര്‍ണര്‍ രാമന്‍ ഡേക, മുഖ്യമന്ത്രി വിഷ്ണു ദേവ് സായ് എന്നിവരും ചടങ്ങില്‍ സംസാരിച്ചു. മറ്റ് നിരവധി മന്ത്രിമാരും ഈ അവസരത്തില്‍ സന്നിഹിതരായിരുന്നു.
നേരത്തെ, ജഗ്ദല്‍പൂരിലെ മാ ദന്തേശ്വരി ക്ഷേത്രം സന്ദര്‍ശിച്ച രാഷ്‌ട്രപതി, പരമ്പരാഗത ആചാരപ്രകാരം പ്രാര്‍ത്ഥനകള്‍ നടത്തി. തുടര്‍ന്ന്, ലോകപ്രശസ്തമായ ബസ്തര്‍ ദസറ ഉത്സവത്തിന്റെ ഭാഗമായ, സിര്‍ഹാസര്‍ ഭവനില്‍ നടന്ന പരമ്പരാഗത ‘മുരിയ ദര്‍ബാറില്‍’ പങ്കെടുത്തു. ഈ വേളയില്‍, പ്രാദേശിക ഗോത്രവര്‍ഗ നേതാക്കള്‍, പൂജാരിമാര്‍ ഉള്‍പ്പെടെയുള്ള പരമ്പരാഗത സമുദായ പ്രതിനിധികളുമായി കൂടിക്കാഴ്ച നടത്തിയ രാഷ്‌ട്രപതി അവരുടെ ആശങ്കകളും പരാതികളും കേട്ടറിഞ്ഞു.
