ഇന്‍ഡോര്‍: സംഘശതാബ്ദിക്കാലത്ത് രാജ്യത്ത് പതിമൂവായിരത്തിലേറെ പുതിയ ശാഖകള്‍ പ്രവര്‍ത്തനം ആരംഭിച്ചുവെന്ന് ആര്‍എസ്എസ് അഖില ഭാരതീയ പ്രചാര്‍ പ്രമുഖ് സുനില്‍ ആംബേക്കര്‍. ഇതോടെ നിത്യശാഖകളുടെ എണ്ണം ഒരു ലക്ഷത്തിലേറെയായി. 101151 ശാഖകളാണ് ഇപ്പോഴുള്ളത്. ആഴ്ച തോറും ചേരുന്ന മിലനുകള്‍, മാസംതോറുമുള്ള സംഘമണ്ഡലികള്‍ എന്നിവയുള്‍പ്പെടെ 110849 സ്ഥലങ്ങളില്‍ നേരിട്ടുള്ള സംഘപ്രവര്‍ത്തനം എത്തിയെന്ന് അദ്ദേഹം പറഞ്ഞു.
ശതാബ്ദിയുടെ ഭാഗമായി വിവിധ ഹിന്ദുസംഘടനകളുടെ നേതൃത്വത്തില്‍ ഇതുവരെ നടന്നത് 65660 ഹിന്ദു സമ്മേളനങ്ങളാണ്. സമൂഹത്തിലെ എല്ലാ വിഭാഗം ജനങ്ങളുടെയും പങ്കാളിത്തം ഉറപ്പാക്കുന്നതായിരുന്നു ഈ സമ്മേളനങ്ങള്‍. ഗൃഹസമ്പര്‍ക്ക പരിപാടികള്‍ക്കും ആവേശകരമായ സ്വീകാര്യതയാണ് ലഭിച്ചത്. പൗരപ്രമുഖ സമ്മേളനങ്ങളിലും ഹിന്ദു സമ്മേളനങ്ങളിലും സ്ത്രീകളുടെ പങ്കാളിത്തം ശ്രദ്ധേയമായിരുന്നു. യുവാക്കള്‍ക്കായി കാമ്പസുകള്‍ കേന്ദ്രീകരിത്തും അല്ലാതെയും സംഘടിപ്പിച്ച പരിപാടികളിലും വലിയ പങ്കാളിത്തമാണുണ്ടായതെന്ന് അദ്ദേഹം പറഞ്ഞു.
