ന്യൂദല്‍ഹി: ശ്രീരാമജന്മഭൂമി പ്രക്ഷോഭം ഭാവാത്മകമായിരുന്നുവെന്നും തികഞ്ഞ ബോധ്യത്തിലധിഷ്ഠിതമായ പ്രതിബദ്ധതയാണ് പ്രക്ഷോഭത്തെ നയിച്ചതെന്നും ആര്‍എസ്എസ് സഹ സര്‍കാര്യവാഹ് അരുണ്‍ കുമാര്‍. പ്രക്ഷോഭത്തെ വിജയിപ്പിച്ചത് ലക്ഷ്യത്തിലെ വിശുദ്ധിയും നയിച്ചവരുടെ ഇച്ഛാശക്തിയുമാണ്. ശ്രീരാമക്ഷേത്രനിര്‍മ്മാണത്തിനായി നടന്ന നിധി സമര്‍പണ്‍ അഭിയാനില്‍ പങ്കെടുത്ത സന്നദ്ധപ്രവര്‍ത്തകരുടെ അനുഭവത്തെ ആസ്പദമാക്കി തയ്യാറാക്കിയ ‘സബ്‌കെ റാം’ എന്ന പുസ്തകം ദല്‍ഹി കോണ്‍സ്റ്റിറ്റിയൂഷന്‍ ക്ലബ്ബില്‍ പ്രകാശനം ചെയ്യുകയായിരുന്നു സഹസര്‍കാര്യവാഹ്.
എല്ലാ പ്രശ്നങ്ങളുടെയും മൂലകാരണം എന്തെന്ന ചോദ്യത്തിന് ആത്മവിസ്മൃതി എന്ന മറുപടിയാണ് സ്വാമി വിവേകാനന്ദന്‍ നല്‍കിയത്. ശ്രീരാമജന്മഭൂമി പ്രക്ഷോഭം ഹിന്ദു സമൂഹത്തിന് ആത്മസാക്ഷാത്കാരത്തിന്റെ നിമിഷമായിരുന്നു. അഞ്ഞൂറ് വര്‍ഷത്തോളം ഭാരതീയര്‍ സമരം ചെയ്തു. അധിനിവേശത്തിനെതിരായ സ്വാതന്ത്ര്യപോരാട്ടമായിരുന്നു അത്. 1947 ല്‍ രാജ്യം സ്വാതന്ത്രമാവുകയും 1950ല്‍ ഭരണഘടന അംഗീകരിക്കപ്പെടുകയും ചെയ്യുമ്പോള്‍ അയോധ്യയില്‍ ഭവ്യമായ ശ്രീരാമക്ഷേത്രം ഉണ്ടാകുമെന്ന് രാഷ്ട്രം പ്രതീക്ഷിച്ചു. എന്നാല്‍ 33 വര്‍ഷം ഒന്നും സംഭവിച്ചില്ല, 1983 മുതല്‍, മുസാഫര്‍നഗറിലെ വിഎച്ച്പി യോഗവും തുടര്‍ന്നുള്ള ധര്‍മ്മ സന്‍സദും ഈ വികാരം പുനരുജ്ജീവിപ്പിക്കുകയായിരുന്നുവെന്ന് അദ്ദേഹം പറഞ്ഞു.
ഹിന്ദു സമൂഹത്തിന് ഒരിക്കലും ഒന്നിക്കാന്‍ കഴിയില്ലെന്നും അവര്‍ അസംഘടിതരും ദുര്‍ബലരും ആണെന്ന മിഥ്യാധാരണകളെ തകര്‍ത്തത് ശ്രീരാമക്ഷേത്രത്തിനായി നടന്ന പ്രക്ഷോഭമാണെന്ന് വിശ്വഹിന്ദുപരിഷത്ത് ജോയിന്റ് സെക്രട്ടറി സുരേന്ദ്രജെയിന്‍ പറഞ്ഞു.
Discussion about this post