കാസര്കോട്: അറിവും സാങ്കേതിക വിദ്യയുമാണ് യുവതലമുറയെ കരുത്തുറ്റതാക്കുന്നതെന്ന് കേന്ദ്ര ഊര്ജ വകുപ്പ് മന്ത്രി ശ്രീപദ് യശോനായിക്. ബാലഗോകുലം ഉത്തരകേരളം വാര്ഷിക പൊതുസഭ ഉദ്ഘാടനം ചെയ്യുകയായിരുന്നു അദ്ദേഹം.
ഭാരതത്തിന്റെ പുരോഗതിക്ക് യുവജനങ്ങളെ ഊര്ജസ്വലതയുള്ളവരാക്കി മാറ്റുക. ബാലഗോകുലം നല്കുന്ന ധാര്മിക മൂല്യങ്ങള് സമൂഹത്തിന് അനിവര്യമാണ്. നമ്മുടെ പ്രധാനമന്ത്രി വികസിത ഭാരതത്തിനുള്ള പ്രയത്നത്തിലാണ്. അദ്ദേഹം പകരുന്ന ഊര്ജ്ജം നമുക്ക് മുതല്ക്കൂട്ടാണ്. മൂല്യാധിഷ്ഠിത വിദ്യാഭ്യാസം പ്രാപ്തമാക്കണം. തൊഴില് നൈപുണ്യം അന്യവര്യമാണ്. കേരളത്തിലെ സംഘപരിവാര് സംഘടനാ പ്രവര്ത്തകരും കാര്യകര്ത്താക്കളും സമര്പ്പണ ബോധമുള്ളവരാണ്. പുതുതലമുറയെ ഭാരതീയയുടെ അടിസ്ഥാനത്തില് വളര്ത്തിയെടുക്കുന്ന ദൗത്യമാണ് ബാലഗോകുലം നിര്വഹിക്കുന്നത്. അത് വളരെ വിജയകരമായി മുന്നോട്ടു പോകുന്നു എന്നതിന്റെ തെളിവാണ് ഈ ഊര്ജസ്വലമായ വേദിയും സദസും. അതിനൊപ്പം ഈ വേദിയില് നില്ക്കാന് കഴിഞ്ഞതില് സന്തോഷമുണ്ട്, കേന്ദ്രമന്ത്രി പറഞ്ഞു.
ബാലഗോകുലം ഉത്തര കേരളം അധ്യക്ഷന് എം. സത്യന് മാസ്റ്റര് അധ്യക്ഷനായി. സി. സദാനന്ദന് മാസ്റ്റര് എംപി മുഖ്യാതിഥിയായി. ഉപ്പള കൊണ്ടാവൂര് നിത്യാനന്ദ യോഗാശ്രമം സ്വാമി യോഗാനന്ദ സരസ്വതി അനുഗ്രഹഭാഷണം നടത്തി. ബാലഗോകുലം സംസ്ഥാന അധ്യക്ഷന് ആര്. പ്രസന്നകുമാര് മുഖ്യപ്രഭാഷണം നടത്തി. വര്ക്കിങ് ചെയര്മാനും റിട്ട. എസ്പിയുമായ ഹരിശ്ചന്ദ്ര നായ്ക്, ബാല സാഹിതി പ്രകാശന് ചെയര്മാന് പി.കെ. വിജയരാഘവന്, കാഞ്ഞങ്ങാട് ജില്ല ബാലസമിതി അധ്യക്ഷ ആര്യനന്ദ എന്നിവര് സംസാരിച്ചു. സംസ്ഥാന പൊതുകാര്യദര്ശി എന്.എം. സദാനന്ദന് വാര്ഷിക റിപ്പോര്ട്ട് അവതരിപ്പിച്ചു. സ്വാഗതസംഘം അധ്യക്ഷന് സി.വി. പൊതുവാള് സ്വാഗതവും ജനറല് കണ്വീനര് രാജേന്ദ്ര മൗവ്വാര് നന്ദിയും പറഞ്ഞു.
പ്രതിനിധിസഭയില് പി.എം. ശ്രീധരന് മാസ്റ്റര് പ്രമേയം അവതരിപ്പിച്ചു. യു. പ്രഭാകരന് മാസ്റ്റര്, സംസ്ഥാന ഉപാധ്യക്ഷന് എന്.വി. പ്രജിത്ത് മാസ്റ്റര്, സംഘടന കാര്യദര്ശി എസ്.ആര്. കണ്ണന് എന്നിവര് സംസാരിച്ചു.
Discussion about this post