പ്രയാഗ് രാജ് :കുംഭമേളയിൽ സ്നാനം ചെയ്യണമെന്ന ആഗ്രഹം പറഞ്ഞ 92 വയസുള്ള അമ്മയെ കൈവണ്ടിയിൽ ഇരുത്തി മഹാകുംഭമേളയ്‌ക്കെത്തിച്ച മകന്റെ ദൃശ്യങ്ങൾ വൈറലാകുന്നു . ഉത്തർപ്രദേശിലെ മുസാഫർനഗറിൽ നിന്നാണ് വയോധികയെ കൈവണ്ടിയിൽ ഇരുത്തി കിലോമീറ്ററുകൾ താണ്ടി മകൻ പ്രയാഗ് രാജിൽ എത്തിച്ചത്.
രാജ്യത്തെ ഏറ്റവും പ്രധാനപ്പെട്ട ആദ്ധ്യാത്മിക ഒത്തുചേരലുകളിൽ ഒന്നായ മഹാകുംഭമേളക്കാലത്ത് ത്രിവേണീ സംഗമത്തിൽ പുണ്യസ്നാനം ചെയ്യുക എന്നത് തന്റെ അമ്മയുടെ ഏറ്റവും വലിയ ആഗ്രഹമായിരുന്നുവെന്നാണ് ആ മകൻ മാദ്ധ്യമങ്ങളോട് പറഞ്ഞത്. തനിക്കും പ്രായത്തിന്റെയും, രോഗത്തിന്റെയുമൊക്കെ ബുദ്ധിമുട്ടുകൾ ഉണ്ടെങ്കിലും അമ്മയുടെ ആഗ്രഹം നിരസിക്കാൻ തോന്നിയില്ലെന്നും അദ്ദേഹം പറഞ്ഞു. നിമിഷങ്ങൾക്കുള്ളിൽ ഈ അമ്മയുടെയും , മകന്റെയും ദൃശ്യങ്ങൾ വൈറലായി കഴിഞ്ഞു. ഏറെ പേരാണ് മകന്റെ മാതൃസ്നേഹത്തെ അഭിനന്ദിച്ച് രംഗത്തെത്തിയത്.
