ശാസ്ത്രം മുഴുവൻ ആഗോള സമൂഹത്തിന്റെയും പൊതുവായ സ്വത്താണ് : പ്രൊഫ. അഭയ് കരന്ദിക്കർ

വാരാണസി: ‘വികസിത ഭാരതം’ എന്ന ലക്ഷ്യത്തിന് അനുസൃതമായി ശാസ്ത്രം, സാങ്കേതികവിദ്യ, നവീകരണം എന്നിവയിൽ ഭാരത കേന്ദ്രീകൃതമായ സമീപനം സ്വീകരിക്കണമെന്ന ആഹ്വാനത്തോടെ വിജ്ഞാൻ ഭാരതിയുടെ ഏഴാമത് ദേശീയ സമ്മേളനം സമാപിച്ചു. തദ്ദേശീയമായ നവീകരണങ്ങളെ പ്രോത്സാഹിപ്പിക്കുക, ഭാരതീയ വിജ്ഞാന പാരമ്പര്യത്തെ ആധുനിക ശാസ്ത്രവുമായി സംയോജിപ്പിക്കുക, ശാസ്ത്രീയ ചർച്ചകളെ സാമൂഹിക പ്രവർത്തനങ്ങളുമായി ബന്ധിപ്പിക്കുക എന്നിവയ്ക്ക് സമ്മേളനത്തിലെ ശാസ്ത്രജ്ഞരും വിദ്യാഭ്യാസ വിചക്ഷണരും ഊന്നൽ നൽകി.

നീതി ആയോഗ് അംഗം പ്രൊഫ. അഭയ് കരന്ദിക്കർ മുഖ്യാതിഥിയായി പങ്കെടുത്തു. ശാസ്ത്ര-സാങ്കേതിക രംഗം ലോകമെമ്പാടും അതിവേഗം മാറിക്കൊണ്ടിരിക്കുകയാണെന്നും സാങ്കേതിക പുരോഗതി വർഷങ്ങൾക്കൊണ്ട് എന്നതിന് പകരം മാസങ്ങൾക്കുള്ളിൽ ദൃശ്യമാകുന്നുണ്ടെന്നും അദ്ദേഹം പറഞ്ഞു. വികസിത ഭാരതത്തിന്റെ നിർമ്മാണത്തിനായി ശാസ്ത്രീയ നവീകരണത്തിൽ പ്രത്യേക ശ്രദ്ധ കേന്ദ്രീകരിക്കേണ്ടതുണ്ട്. തദ്ദേശീയ നവീകരണത്തെക്കുറിച്ച് സംസാരിക്കുമ്പോൾ അത് ലോകത്തിൽ നിന്ന് ഒറ്റപ്പെടുക എന്നല്ല അർത്ഥമാക്കുന്നതെന്ന് അദ്ദേഹം വ്യക്തമാക്കി. കാരണം, ശാസ്ത്രം മുഴുവൻ ആഗോള സമൂഹത്തിന്റെയും പൊതുവായ സ്വത്താണ്. ഭാരതം സ്വന്തം പുരാതന ശാസ്ത്ര പാരമ്പര്യങ്ങളെ ആധുനിക ശാസ്ത്രീയ വീക്ഷണത്തോടെ പഠിക്കുകയും, ലോകത്തിന് തന്നെ വഴികാട്ടിയാകാൻ കഴിയുന്ന രീതിയിൽ തങ്ങളുടെ വെല്ലുവിളികൾക്ക് പരിഹാരം കാണുകയും വേണമെന്നും അദ്ദേഹം കൂട്ടിച്ചേർത്തു.

നീതി ആയോഗ് അംഗം പ്രൊഫ. ഗോവർധൻ ദാസ്, കാശി ഹിന്ദു സർവകലാശാല വൈസ് ചാൻസലർ പ്രൊഫ. അജിത് കുമാർ ചതുർവേദി, വിജ്ഞാൻ ഭാരതി ദേശീയ അധ്യക്ഷൻ ഡോ. ശേഖർ സി. മാൻഡെ, ദേശീയ സംഘടനാ സെക്രട്ടറി ഡോ. ശിവ് കുമാർ ശർമ തുടങ്ങിയവർ സമ്മേളനത്തിൽ സംസാരിച്ചു. കൃത്രിമ ബുദ്ധി (AI), വൺ ഹെൽത്ത്, നെറ്റ്-സീറോ തുടങ്ങിയ ആഗോള വെല്ലുവിളികൾ നേരിടുന്നതിൽ ആധുനിക ശാസ്ത്രത്തോടൊപ്പം ഭാരതീയ വിജ്ഞാന പാരമ്പര്യത്തെയും ഉൾപ്പെടുത്തേണ്ടതിന്റെ ആവശ്യകതയെക്കുറിച്ച് സമ്മേളനത്തിൽ ചർച്ചകൾ നടന്നു.

‘വികസിത ഭാരതം’ എന്ന ലക്ഷ്യം കൈവരിക്കുന്നതിനായി ഭാരത കേന്ദ്രീകൃതമായ പുതിയ ശാസ്ത്ര, സാങ്കേതിക, നവീകരണ നയം രൂപീകരിക്കണമെന്ന് വിജ്ഞാൻ ഭാരതി സമ്മേളനത്തിൽ പ്രമേയം പാസാക്കി. ഗവേഷണ നിലവാരം ഉയർത്തുക, വ്യവസായ-അക്കാദമിക് സഹകരണം ശക്തിപ്പെടുത്തുക, പ്രാദേശിക ഭാഷകളിൽ ശാസ്ത്രീയ ആശയവിനിമയം നടത്തുക, ദേശീയ വിദ്യാഭ്യാസ നയം 2020-ന് അനുസൃതമായി ഗവേഷണ-നവീകരണ ആവാസവ്യവസ്ഥ വികസിപ്പിക്കുക തുടങ്ങിയ നിർദ്ദേശങ്ങളും പ്രമേയത്തിൽ ഉൾപ്പെടുത്തിയിട്ടുണ്ട്. വിജ്ഞാൻ ഭാരതി ദേശീയ സെക്രട്ടറി പ്രൊഫ. രഞ്ജന അഗർവാൾ ആണ് ദേശീയ പ്രമേയം അവതരിപ്പിച്ചത്.