പശ്ചിമ ബംഗാൾ (കല്യാണി ) : രാജ്യത്തു എല്ലാ സംസ്ഥാനങ്ങളിലും സർക്കാർ ജീവനക്കാർക്ക് കേന്ദ്രത്തിന് തുല്ലമായ ആനുകൂല്ല്യങ്ങൾ നൽകുവാൻ സംസ്ഥാന സർക്കാരുകൾ തയ്യാറാകണമെന്ന് ബി.എം.എസ് അഖിലേന്ത്യാ ഉപാദ്ധ്യക്ഷനും സർക്കാർ ജീവനക്കാരുടെ അഖിലേന്ത്യാ സംഘടനയായ രാഷ്ട്രീയ രാജ്യകർമ്മചാരി മഹാസംഘ് പ്രഭാരിയും ആയ ഉണ്ണികൃഷ്ണൻ ഉണ്ണിത്താൻ ആവശ്യപ്പെട്ടു.
രാഷ്ട്രീയ രാജ്യകർമ്മചാരി മഹാസംഘ് അഖില ഭാരതീയ കാര്യകാരി സമിതി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പശ്ചിമ ബംഗാളിലെ കല്യാണി വിധാൻ ചന്ദ്ര കാർഷിക സർവ്വകലാശാലയിൽ നടന്ന ആർ ആർ കെ എം എസ് അഖിലേന്ത്യ പ്രവർത്തക സമിതി യോഗത്തിൽ പ്രസിഡന്റ് ഗൗരവ് സോണി അദ്ധ്യക്ഷത വഹിച്ചു. പല സംസ്ഥാനങ്ങളിലും ശമ്പള കമ്മീഷൻ നടപ്പിലാക്കേണ്ട കാലഘട്ടം കഴിഞ്ഞുവെങ്കിലും കമ്മീഷൻ അംഗങ്ങളെ പോലും നിശ്ചയിച്ചിട്ടില്ല.
പല സംസ്ഥാനങ്ങളിലും വിരമിക്കൽ പ്രായം വ്യത്യസ്ഥമാണ്. ആയതിനാൽ വിരമിക്കൽ പ്രായം 62 വയസ്സായി എല്ലാ സംസ്ഥാനങ്ങളും ഏകീകരിക്കണം. പെൻഷൻ ആനുകൂല്യങ്ങൾ മെഡിക്കൽ ആനുകൂല്യങ്ങൾ എന്നിവ ഗുരുതരമായ പ്രതിസന്ധിയിലാണ്, കരാർ നിയമനം വ്യാപകമാകുന്നു ഈ സാഹചര്യങ്ങൾക്ക് അറുതിവരുത്തണം ഇതിനായി നിയമനിർമാണം കേന്ദ്രസർക്കാർ നടപ്പിലാക്കണം. എട്ടാം ശമ്പളപരിഷ്കരണം എല്ലാ സംസ്ഥാനങ്ങളും അംഗീകരിക്കത്തക്ക തരത്തിലുള്ള നിയമങ്ങൾ കേന്ദ്രസർക്കാർ നിയമ നിർമ്മാണത്തിലൂടെ നടപ്പിലാക്കാൻ തയ്യാറാകണമെന്നും ഉണ്ണികൃഷ്ണൻ ഉണ്ണിത്താൻ അഭിപ്രായപ്പെട്ടു.
സർക്കാർ ജീവനക്കാരെ പൊതുസമൂഹത്തിൽ അധിക്ഷേപിക്കുന്ന തരത്തിലാണ് പല സർക്കാരുകളിൽ നിന്നുള്ള പ്രവണത. സർക്കാരിൻ്റെ ബാധ്യതയായി ജീവനക്കാരെ ഉയർത്തിക്കാട്ടുന്നത് ഇന്ന് വ്യാപകമാകുന്നു ഇത് ജീവനക്കാർക്ക് ആശങ്ക ഉളവാക്കുന്നതാണ്.
സർക്കാരുകൾ ഉണ്ടാക്കിയിരിക്കുന്ന സാമ്പത്തിക ബാധ്യത ജീവനക്കാർക്ക് ശമ്പളം കൊടുക്കുന്നത് കൊണ്ടല്ല എന്ന യാഥാർത്ഥ്യം പൊതുസമൂഹം തിരിച്ചറിയണമെന്നും അദ്ദേഹം പറഞ്ഞു. മാറിമാറി വരുന്ന സർക്കാരുകളുടെ കെടുകാര്യസ്ഥതയും പദ്ധതി നിർവ്വഹണത്തിലെ അപാകതകളുമാണ് സാമ്പത്തിക പ്രതിസന്ധിയുടെ അടിസ്ഥാന കാരണമെന്ന് അദ്ദേഹം അഭിപ്രായപ്പെട്ടു.
ജീവനക്കാർ ജോലിക്കൊപ്പം കടമയും നിർവഹിക്കണംമെന്നും അദ്ദേഹം പറഞ്ഞു. കേരളത്തിൽ നിന്നും പ്രതിനിധികളായി ഫെറ്റോ ജന: സെക്രട്ടറി ജെ മഹാദേവൻ, എൻ. ജി. ഒ സംഘ് ട്രഷറർ സജീവൻ ചാത്തോത്ത് എന്നിവർ പങ്കെടുത്തു.
ബിഎംഎസ് അഖിലേന്ത്യാ സംഘടന സെക്രട്ടറി ഗണേശ് മിശ്ര, കേന്ദ്ര ഗവൺമെൻറ് സെക്ടർ പ്രഭാരി എം പി സിംഗ്, രാഷ്ട്രീയ രാജ്യ കർമ്മചാരി മഹാസംഘ് ജനറൽ സെക്രട്ടറി രാജേന്ദ്രകുമാർ ശ്രീവാസ്തവ, എം എൽ എ മാരായ അസീം സർക്കാർ, ബംങ്കിംഗ് ചന്ദ്രഘോഷ്, ബി എം എസ് പശ്ചിമ ബംഗാൾ സ്റ്റേറ്റ് ജനറൽ സെക്രട്ടറി ദേവാഷി ഭട്ടാചാര്യ, രാഷ്ട്രീയ രാജ്യ കർമ്മ ചാരി ബംഗാൾ സ്റ്റേറ്റ് ജനറൽ സെക്രട്ടറി ആശിഷ് ചന്ദ്രോപാദ്ധ്യായ, പ്രസിഡൻറ് അനുപം സർക്കാർ എന്നിവർ സംസാരിച്ചു.
Discussion about this post