ഭുവനേശ്വര്(ഒഡീഷ): മതപരിവര്ത്തനത്തിനെതിരെ പൊരുതി ജീവന് വെടിഞ്ഞ വേദാന്ത കേസരി സ്വാമി ലക്ഷ്മണാനന്ദ സരസ്വതിയുടെ ജന്മശതാബ്ദി പ്രമാണിച്ച് ഒരു വര്ഷം തുടരുന്ന ആഘോഷങ്ങള്ക്ക് ഒഡീഷയില് നാളെ തുടക്കമാകും. ഒഡീഷയില് മാത്രം 25,000 സ്ഥലങ്ങളില് പരിപാടികള് നടക്കും. നാളെ താല്ചേറിലെ ഗുരുജംഗയില് നടക്കുന്ന ശതാബ്ദി ആഘോഷം ഒഡീഷ മുഖ്യമന്ത്രി മോഹന് ചരണ് മാഝി ഉദ്ഘാടനം ചെയ്യുമെന്ന് സ്വാമി ലക്ഷ്മണാനന്ദ സരസ്വതി ജന്മശതാബ്ദി ആഘോഷ സമിതി പ്രസിഡന്റ് സ്വാമി ജീവന്മുക്താനന്ദപുരിയും കണ്വീനര് ബിനയ് കുമാര് ഭൂയാനും വാര്ത്താസമ്മേളനത്തില് അറിയിച്ചു.
കലശ ഘോഷയാത്ര, ഗോപൂജ, യജ്ഞം, നഗരപ്രദക്ഷിണം, ധാര്മ്മിക സമ്മേളനം, സാംസ്കാരിക പരിപാടികള്, പ്രഭാഷണങ്ങള്, സ്വാമിജിയുടെ ജീവിത ആദര്ശങ്ങളെ അടിസ്ഥാനമാക്കിയുള്ള പ്രദര്ശനം എന്നിവ ആഘോഷത്തിന്റെ ഭാഗമാണ്. സ്വാമി ബ്രഹ്മാനന്ദ സരസ്വതി, സ്വാമി സച്ചിദാനന്ദ, ശിവദാസ് ബാബ, സ്മൃതി സാഗര് മഹാരാജ്, ജീവന് ചൈതന്യ മഹാരാജ്, സച്ചിദാനന്ദ് ദാസ് മഹാരാജ്, ബാബാ വിശ്വനാഥ് ദാസ്, ശാരദാനന്ദ സരസ്വതി, അവിനാശ് ബാബ, ആര്എസ്എസ് ക്ഷേത്രകാര്യവാഹ് ദുര്ഗ്ഗാ പ്രസാദ് സാഹു തുടങ്ങിയവര് പങ്കെടുക്കും.
സെപ്തംബര് നാല് വരെ എല്ലാ ഗ്രാമങ്ങളിലും ലക്ഷ്മണാനന്ദ സരസ്വതി സ്മൃതി പരിപാടികള് നടക്കും. ഒക്ടോബറില്ചകാപാദില് സംസ്കൃത സമ്മേളനവും ജലേസ്പതയില് വനിതാ സമ്മേളനവും നടക്കും. നവംബറില് സാംബല്പൂര്, ബ്രഹ്മപൂര്, ഭുവനേശ്വര്, ഹരിദ്വാര്, ദല്ഹി, മുംബൈ, ബെംഗളൂരു, ഹൈദരാബാദ്, കൊല്ക്കത്ത തുടങ്ങിയ കേന്ദ്രങ്ങളില് മഹാസമ്മേളനങ്ങളുണ്ടാകും. 2027 ജനുവരി മുതല് ഏപ്രില് വരെ, എല്ലാ ഗ്രാമങ്ങളിലും സംന്യാസിമാരുടെ നേതൃത്വത്തില് ജാഗരണയാത്രകളും മെയ് മാസത്തില് ബ്ലോക്ക്, നഗര തലങ്ങളില് വിശാലഹിന്ദു സമ്മേളനങ്ങളും നടക്കും.
