അഖിലകേരള അക്ഷരശ്ലോക മത്സരത്തിൽ ഒന്നാം സ്ഥാനം ലഭിച്ച കെ.എൻ പ്രഭാകരനെ ആദരിച്ചു

കോട്ടയം: കേരള അക്ഷരശ്ലോക ഫെഡറേഷൻ തിരുവനന്തപുരത്ത് 2024 ഒക്ടോബർ 2ന് സംഘടിപ്പിച്ച അഖിലകേരള അക്ഷരശ്ലോക മത്സരത്തിൽ കോട്ടയം നട്ടാശ്ശേരി സ്വദേശി കെ.എൻ പ്രഭാകരന് ഒന്നാം സ്ഥാനം ലഭിച്ചു. അദ്ദേഹത്തെ രാഷ്ട്രീയ സ്വയംസേവക സംഘം കോട്ടയം വിഭാഗ് കാര്യവാഹ് ആർ സാനു ആദരിച്ചു.

വാർദ്ധക്യത്തിലും അക്ഷരശ്ലോക സാധനയെ കൈവിടാതെ ഇപ്പോഴും പുതിയ ശ്ലോകങ്ങൾ പഠിക്കുകയും അക്ഷരശ്ലോക സദസ്സുകളിലും, പഠന ക്ലാസുകളിലും പങ്കെടുക്കുകയും ചെയ്യുന്നു എന്ന് പ്രഭാകരൻ പറഞ്ഞു. സ്കൂൾ കാലം മുതൽ തന്നെ ശ്ലോകങ്ങളും കീർത്തനങ്ങളും പഠിക്കുകയും കുമാരനെല്ലൂർ കേന്ദ്രീകരിച്ച് നടന്നിരുന്ന അക്ഷരശ്ലോക സദസ്സുകളിൽ അദ്ദേഹം പങ്കെടുക്കുകയും ചെയ്തിരുന്നു. കുട്ടിക്കാലത്ത് വീട്ടിൽ നിന്നും അധ്യാപകരുടെ ഇടയിൽ നിന്നും ലഭിച്ച പ്രോത്സാഹനമാണ് ഈ പ്രായത്തിലും ആവേശം ചോരാതെ മത്സരത്തിൽ പങ്കെടുപ്പിക്കുന്നത് എന്നും അദ്ദേഹം പറഞ്ഞു.