വായനയുടെ ലോകത്ത്‌ ഒരു ഗ്രാമം കൈകോർക്കുന്നു..

ജയകുമാർ രാമകൃഷ്ണൻ

നീലംപേരൂർ എന്ന് കേൾക്കുമ്പോൾ നമ്മുടെ മനസ്സിലേക്ക് ഓടിവരുന്നത് രണ്ട് കാര്യങ്ങളാണ്. ഒന്ന് നീലംപേരൂർ പള്ളി ഭഗവതിയുടെ പടയണിയാണ്. മറ്റൊന്ന് കേരളത്തിന്റെ സാഹിത്യ സാംസ്കാരിക ലോകത്ത്‌ ഗ്രന്ഥശാല പ്രസ്ഥാനം കൊണ്ട് സ്വയം അടയാളപ്പെടുത്തിയ പി എൻ പണിക്കരുടെ ഓർമ്മകളാണ്.

കാൽനടയായും, കഷ്ടപ്പെട്ടും അദ്ദേഹം പടുത്തുയർത്തിയ കേരള ഗ്രന്ഥശാല സംഘം കേരളത്തിലെ ആയിരക്കണക്കിന് ഗ്രന്ഥശാലകളെ ഒരു കുടക്കീഴിൽ കൊണ്ടുവരുവാൻ ഇടയാക്കി. അവയുടെ സുഗമമായ നടത്തിപ്പിന് അനുയോജ്യമായ പദ്ധതികളും അദ്ദേഹം വിഭാവനം ചെയ്തിരുന്നു.

അദ്ദേഹത്തിന്റെ ചരമദിനമായ ജൂൺ 19 വായന ദിനമായി ആചരിക്കുന്നു. 2017 മുതൽ ദേശീയ വായനാദിനമായി അത് ആചരിച്ചുവരുന്നു. എല്ലാവർഷവും ജൂൺ 19 മുതൽ ഒരാഴ്ചക്കാലം വായനാവാരമായി സംസ്ഥാന സർക്കാരും ഒരു മാസക്കാലം വായനാമാസമായി കേന്ദ്രസർക്കാരും പ്രഖ്യാപിച്ചിട്ടുണ്ട്.

അദ്ദേഹം സമൂഹത്തിന് പകർന്നു നൽകിയ വായനയുടെയും ജ്ഞാനാർജ്ജനത്തിന്റെയും ആവേശം ഈ സമൂഹത്തിൽ നിലനിൽക്കണം എന്ന ആഗ്രഹത്തോടെ കൂടി അദ്ദേഹത്തിന്റെ ജന്മദേശം ആയ നീലംപേരൂരിൽ പി എൻ പണിക്കർ സ്മാരക വായനക്കൂട്ടം എന്ന പേരിൽ ഒരു സമിതി 2024 ജൂൺ മാസം 19-ാം തീയതി ആരംഭിച്ചു.

സമൂഹത്തിൽ പടർന്നു പന്തലിക്കുന്ന തെറ്റായ ആഖ്യാനങ്ങൾക്കെതിരെ ചരിത്രത്തിന്റെ നേർവായനയിലൂടെ പ്രതിരോധം തീർക്കുവാനും സാഹിത്യ കൗതുകത്തിലൂടെ സാംസ്കാരിക ഔന്നത്യം പുതുതലമുറയ്ക്ക് പകർന്നു നൽകുവാനും ലക്ഷ്യം വെച്ചുകൊണ്ടാണ് ഈ പ്രവർത്തനമാരംഭിച്ചത്.
ശ്രീ പി എൻ പണിക്കർ ആദ്യമായി സ്ഥാപിച്ച സനാതന ധർമ്മ വായനശാലയുടെ സഹകരണത്തോടുകൂടി ആയിരുന്നു ഈ പ്രവർത്തനം ആരംഭിച്ചത്.
ആരംഭിച്ച ഒരു വർഷം പിന്നിട്ടു കഴിഞ്ഞപ്പോൾ ആവേശകരമായ സ്വീകരണം ആണ് ഈ ഗ്രാമത്തിലെ ജനങ്ങൾ ഈയൊരു പരിപാടിക്ക് നൽകിയത്. പ്രായഭേദമന്യേ ജാതിമത രാഷ്ട്രീയ ഭേദമന്യേ സായാഹ്നങ്ങളിൽ ഒത്തുചേർന്ന് മാസത്തിലൊന്ന് ഒരു പുസ്തകത്തെപ്പറ്റി ചർച്ചചെയ്യുകയും വായനാനുഭവങ്ങൾ പരസ്പരം പങ്കുവയ്ക്കുകയും മുൻകൂട്ടി നിശ്ചയിച്ച ഒരാൾ വിശദമായ പുസ്തകനിരൂപണം പ്രഭാഷണമായി അവതരിപ്പിക്കുകയും ചെയ്യും.
പുസ്തകങ്ങൾ വായിക്കാനും വാങ്ങിക്കുവാനും പതുക്കെ പതുക്കെ ആളുകൾക്ക് താല്പര്യമായി തുടങ്ങിയിട്ടുണ്ട്.
പ്രാദേശിക എഴുത്തുകാരെ പ്രോത്സാഹിപ്പിക്കുന്നതിനും സമിതി ശ്രദ്ധ നൽകിവരുന്നു. അവരെ പ്രത്യേകം ആദരിക്കുന്നതിന് പരിപാടികൾ സംഘടിപ്പിക്കുകയുണ്ടായി.
പുസ്തക പാരായണ തൽപരരായവരെയും സമ്പർക്കത്തിലൂടെ കണ്ടെത്തുകയുണ്ടായി. അതിൽ 75 വയസ്സുള്ള സരോജിനി എന്ന അമ്മയെ സമിതി പ്രത്യേകമായി ആദരിക്കുകയുണ്ടായി.
ശ്രീ പി പരമേശ്വരൻ രചിച്ച ശ്രീനാരായണ ഗുരു – നവോത്ഥാനത്തിന്റെ പ്രവാചകന്‍ എന്ന ഗ്രന്ഥമാണ് ആദ്യമായി ഇവിടെ ചർച്ച ചെയ്തത്.
എല്ലാ മാസത്തെയും വായനാദിനത്തിൽ സമൂഹത്തിലെ ആദരണീയരായ നിരവധി വ്യക്തികളെ അധ്യക്ഷ സ്ഥാനത്ത് എത്തിക്കുവാനും സമിതിക്ക് സാധിച്ചു.
സാമാജിക സമരസത എന്ന ലക്ഷ്യം മുന്നിൽക്കണ്ട് അയ്യങ്കാളി ജയന്തിക്ക് നടന്ന വായനക്കൂട്ടം ശ്രദ്ധേയമായി. നാരകത്തറ എൻഎസ്എസ് ഓഡിറ്റോറിയത്തിൽ എസ്എൻഡിപി ശാഖാ യോഗം പ്രസിഡന്റ് അധ്യക്ഷത വഹിച്ച് ശ്രീ അയ്യൻകാളിയെ കുറിച്ചുള്ള ഗ്രന്ഥം ചർച്ച ചെയ്തു. ദളിത് സമുദായ സംഘടന നേതാക്കളും ഈ പരിപാടിയിൽ പങ്കെടുത്തു.
ഗ്രാമത്തിലെ വിവിധ പ്രദേശങ്ങളിൽ വച്ചാണ് ഈ വായനക്കൂട്ടം എല്ലാ മാസവും സംഘടിപ്പിക്കുന്നത്.
പുതുതായി വരുന്ന കേൾവിക്കാരെ കൂടാതെ സ്ഥിരമായി വരുന്ന അമ്പതോളം ശ്രോതാക്കളും വായനകുതുകികളും ഈയൊരു സമിതിയുടെ പ്രത്യേകതയാണ്.
ശ്രീ പി കെ ശ്രീകുമാർ അധ്യക്ഷനായും സതീഷ് കുമാർ എ എസ്സ് സെക്രട്ടറിയായും പ്രവർത്തിക്കുന്ന ഈ സമിതി വരും വർഷങ്ങളിൽ കൂടുതൽ പ്രദേശങ്ങളിലേക്ക് വായന കൂട്ടവുമായി എത്തിച്ചേരുവാൻ തീരുമാനിച്ചിരിക്കുന്നു.