തിരുവനന്തപുരം: ഭാരതീയ വിചാരകേന്ദ്രത്തിന്റെ ആഭിമുഖ്യത്തില് രണ്ടു ദിവസമായി സംസ്കൃതി ഭവനില് നടന്ന പൂര്ണം ശില്പശാല സമാപിച്ചു. മാറിക്കൊണ്ടിരിക്കുന്ന വിദ്യാഭ്യാസ-തൊഴില് മേഖലകളെക്കുറിച്ചുള്ള മാര്ഗദര്ശനം, ലൈഫ് സ്കില് വികസനം തുടങ്ങിയ വിഷയങ്ങള് കേന്ദ്രീകരിച്ചു നടന്ന ശില്പശാലയുടെ സമാപന ചടങ്ങില് തിരുവനന്തരം മേയര് വി.വി. രാജേഷ് മുഖ്യാതിഥിയായി പങ്കെടുത്തു.
അവനവന്റെ ഉള്ളിലുള്ള കഴിവിനെ കണ്ടറിഞ്ഞു വികസിപ്പിക്കണം. അതോടൊപ്പം പുതിയ ആശയങ്ങള് ആവിഷ്ക്കരിക്കുന്ന കാര്യത്തിലും വിദ്യാര്ത്ഥികള് ശ്രദ്ധിക്കണമെന്നും രാജേഷ് നിര്ദ്ദേശിച്ചു. ആയിരക്കണക്കിന് മൈലുകള് താണ്ടി മുമ്പ് വിദേശശക്തികള് ഭാരതത്തിലേക്കു വന്നത് നമ്മള് പലതരത്തില് സമ്പന്നരായിരുന്നതുകൊണ്ടാണ്. അതിലും മെച്ചപ്പെട്ട ഒരു കാലത്തിലേക്കാണ് ഭാരതം നീങ്ങുന്നത്. അടുത്ത ഇരുപതു വര്ഷത്തിനുള്ളില് ഭാരതം ഒരു വികസിത രാഷ്ട്രമായി മാറുമ്പോള് യുവത്വത്തിന്റെ നെറുകയിലെത്തുന്ന ഒരു തലമുറയാണ് ഈ ശില്പശാലയില് പങ്കെടുക്കുന്നതെന്നും ആ നിലയ്ക്ക് ഭാഗ്യശാലികളാണെന്നും അദ്ദേഹം അഭിപ്രായപ്പെട്ടു.
വിദ്യാര്ത്ഥികള് ഉള്പ്പെടെ എല്ലാവിഭാഗം ജനങ്ങളുടെയും അഭിപ്രായം കണക്കിലെടുത്തു കൊണ്ടാവണം വികസന കാര്യങ്ങള് മുന്നോട്ടുകൊണ്ടുപോകേണ്ടതെന്ന കാഴ്ചപ്പാടാണ് കോര്പറേഷന്റെ കാര്യത്തില് തങ്ങള്ക്കുള്ളതെന്നും രാജേഷ് അഭിപ്രായപ്പെട്ടു. വിചാരകേന്ദ്രം സംസ്ഥാന അധ്യക്ഷന് ഡോ. സി.വി. ജയമണി അദ്ധ്യക്ഷത വഹിച്ചു. ഡയറക്ടര് ആര്. സഞ്ജയന്, വി.വി. രാജേഷിനെ ഷാള് അണിയിച്ച് ആദരിച്ചു. വിദ്യാര്ത്ഥികള്ക്കുള്ള സര്ട്ടിഫിക്കറ്റുകള് മേയര് വിതരണം ചെയ്തു. ശില്പശാല സംയോജകന് പ്രൊഫ. കെ. ഗോപാല കൃഷ്ണന് അവലോകനം അവതരിപ്പിച്ചു. ജനറല് കണ്വീനര് ഡോ. വിജയകുമാരന് നായര് നന്ദി രേഖപ്പെടുത്തി.
തിരുവനന്തപുരം മെഡിക്കല് കോളജ് സൈക്യാട്രി വിഭാഗത്തിലെ അരുണ് ബി. നായര്, ട്രിനിറ്റി കോളജ് ഓഫ് എഞ്ചിനീയറിങ്ങിലെ പ്രൊഫ. അരുണ് സുരേന്ദ്രന്, മാതൃഭൂമി മുന് ന്യൂസ് എഡിറ്റര് ബി. അരുണ്കുമാര്, മറൈന് ട്രേഡ്- ലോജിസ്റ്റിക്സ് മേഖലകളില് വിദഗ്ധനായ നാണു വിശ്വനാഥന് എന്നിവരാണ് രണ്ടാം ദിവസത്തെ ക്ലാസ്സകള് നയിച്ചത്. വന്ദേമാതരത്തോടെ ആരംഭിച്ച ചടങ്ങുകള് ദേശീയ ഗാനത്തോടെ സമാപിച്ചു.
Discussion about this post