കോമൺ വെൽത്ത് ഗെയിംസ് സമാപന വേദി വന്ദേമാതരോത്സവമായി

ഗ്ലാസ്ഗോ: അടുത്ത കോമൺവെൽത്ത് ഗെയിംസ് 2030 ൽ ഭാരതത്തിൽ നടക്കും. 11 ദിവസത്തെ മത്സരങ്ങൾക്കുശേഷം ഗ്ലാസ്‌ഗോവിലെ സിഡബ്ല്യുജി മത്സരങ്ങൾ അവസാനിച്ചു. ഭാരതം മെഡൽനിലയിൽ നാലാം സ്ഥാനത്താണ്. ഞായറാഴ്ച ഗ്ലാസ്ഗോയിലെ ഓവോ ഹൈഡ്രോയിൽ നടന്ന തിളക്കമാർന്ന സമാപന ചടങ്ങിൽ, 2030 ലെ നാഴികക്കല്ലായ ശതാബ്ദി പതിപ്പിന് ആതിഥേയത്വം വഹിക്കുന്ന ഭാരത്തിന് സ്‌കോട്ട്‌ലൻഡ് ഔദ്യോഗികമായി കോമൺവെൽത്ത് ഗെയിംസ് പതാകയും ആചാരപരമായ ബാറ്റണും കൈമാറി.

2030 ലെ കോമൺവെൽത്ത് ഗെയിംസ് അഹമ്മദാബാദിൽ നടക്കും, ഓസ്ട്രേലിയയ്‌ക്ക് ശേഷം ഒന്നിലധികം തവണ മൾട്ടി-സ്പോർട്സ് ഇവന്റിന് ആതിഥേയത്വം വഹിക്കുന്ന രണ്ടാമത്തെ രാജ്യമായി ഭാരതം മാറുകയാണ്. മുമ്പ് 2010 ൽ ഭാരതം ന്യൂദൽഹിയിൽ ഗെയിംസിന് വേദിയൊരുക്കിയിരുന്നു.

ചാൾസ് മൂന്നാമൻ രാജാവിനെ പ്രതിനിധീകരിച്ച് എഡിൻബർഗ് ഡ്യൂക്ക് രാജകുമാരൻ എഡ്വേർഡ് ഗെയിംസ് ഔദ്യോഗികമായി അവസാനിച്ചുവെന്ന് പ്രഖ്യാപിച്ചു. ‘നിങ്ങൾ മത്സരിച്ച രീതിക്കും, ഒഫീഷ്യൽ ചെയ്തതിനും, പിന്തുണച്ചതിനും, ഗെയിംസ് സംഘടിപ്പിച്ചതിനും നന്ദി. ഇന്ന് രാത്രി നിങ്ങൾ വീണ്ടും കോമൺവെൽത്തിന്റെ ചൈതന്യവും മൂല്യവും കൊണ്ടുവന്നു. നന്ദി, ഗ്ലാസ്ഗോ,’ അദ്ദേഹം പറഞ്ഞു.

’24-ാമത് കോമൺവെൽത്ത് ഗെയിംസിന്റെ നൂറാം വാർഷികം ആഘോഷിക്കാൻ നാല് വർഷത്തിനുള്ളിൽ ഇന്ത്യയിലെ അഹമ്മദാബാദിലേക്ക് വരാൻ എല്ലാ രാജ്യങ്ങളിലെയും പ്രദേശങ്ങളിലെയും അത്ലറ്റുകളോട് ഞാൻ ആഹ്വാനം ചെയ്യുന്നു,’ അദ്ദേഹം കൂട്ടിച്ചേർത്തു.

സമാപന ചടങ്ങിൽ
വനിതാ 57 കിലോഗ്രാം വിഭാഗം ബോക്സിംഗ് മത്സരത്തിൽ സ്വർണ്ണം നേടിയ ജെയ്സ്മിൻ ലംബോറിയ ഭാരതപതാക വഹിച്ചു.

കോമൺവെൽത്ത് ഗെയിംസ് പതാക അരങ്ങിലൂടെ പ്രതീകാത്മകമായി സഞ്ചരിച്ചതോടെയാണ് ഔപചാരിക കൈമാറ്റം ആരംഭിച്ചത്.

തുടർന്ന് ഗ്ലാസ്ഗോ ലോർഡ് പ്രൊവോസ്റ്റ് ജാക്വലിൻ മക്ലാരൻ, കോമൺവെൽത്ത് ഗെയിംസ് സ്‌കോട്ട്ലൻഡ് വൈസ് ചെയർ സൂസൻ ജാക്സൺ, സ്‌കോട്ടിഷ് നെറ്റ്ബോൾ താരം എമിലി നിക്കോൾ, കോമൺവെൽത്ത് സ്പോർട്സ് പ്രസിഡന്റ് ഡോ. ഡൊണാൾഡ് റുക്കാരെ, രണ്ടുതവണ ഒളിമ്പിക് മെഡൽ ജേതാവ് നീരജ് ചോപ്ര, ഭാരത ഒളിമ്പിക് അസോസിയേഷൻ പ്രസിഡന്റ് പി.ടി. ഉഷ, ഒടുവിൽ ഗുജറാത്ത് ഉപമുഖ്യമന്ത്രി ഹർഷ് സംഘവി എന്നിവർക്ക് പതാക കൈമാറി.

സ്‌കോട്ട്ലൻഡിൽ നിന്ന് ഇന്ത്യയിലേക്ക് ആതിഥേയത്വ ചുമതലകൾ കൈമാറുന്ന ചടങ്ങ് ഔദ്യോഗികമായി അടയാളപ്പെടുത്തി, 2030 ലെ കോമൺവെൽത്ത് ഗെയിംസിന്റെ നൂറാം വാർഷിക പതിപ്പിന് അഹമ്മദാബാദ് വേദിയൊരുക്കി.

ഭാരതത്തിന്റെ സമ്പന്നമായ സാംസ്‌കാരിക വേഷവിധാനം കേന്ദ്രബിന്ദുവായി. സ്‌കോട്ട്‌ലൻഡിന്റെ സമ്പന്നമായ സാംസ്‌കാരിക പൈതൃകത്തിന്റെ ആഘോഷത്തോടെയാണ് സമാപന ചടങ്ങ് ആരംഭിച്ചത്, തുടർന്ന് ഭാരത സാംസ്‌കാരിക വൈവിധ്യത്തിന്റെയും നൂറ്റാണ്ടുകൾ പഴക്കമുള്ള പാരമ്പര്യങ്ങളുടെയും വർണ്ണാഭമായ പ്രദർശനമായി മാറി.

ഭാരതത്തിന്റെ കൈമാറ്റ അവതരണം മൂന്ന് ഘട്ടമായിട്ടായിരുന്നു. ആദ്യമായി ഒരു സാംസ്‌കാരിക യാത്രയിലേക്ക് പ്രേക്ഷകരെ നയിച്ചു. ‘വസുധൈവ കുടുംബകം’ – ‘ലോകം ഒരു കുടുംബമാണ്’ – എന്ന പുരാതന ഭാരത തത്ത്വചിന്തയെ ചുറ്റിപ്പറ്റിയാണ് പ്രദർശനം ഒരുക്കിയത് – കോമൺവെൽത്തിന്റെ ഐക്യം, സൗഹൃദം, ഉൾക്കൊള്ളൽ എന്നിവയുടെ ആദർശങ്ങളെ പ്രതിഫലിപ്പിക്കുന്ന ഒരു പ്രമേയം.

ഭാരതദേശീയ ഗീതമായ വന്ദേമാതരത്തിന്റെ 150 വർഷത്തെ ഉദ്ഘാടന ചടങ്ങിൽ നടി മാനുഷി ചില്ലർ നയിച്ച ഗംഭീര നൃത്തരൂപം അവതരിപ്പിച്ചു.

ചടങ്ങിന്റെ ഒരു പ്രധാന ആകർഷണം, ഗ്ലാസ്ഗോയിൽ നിന്ന് അഹമ്മദാബാദിലേക്ക് ബാറ്റൺ കൈമാറ്റം ചെയ്യുന്നതിന്റെ പ്രതീകമായ ഒരു ഊർജ്ജസ്വലമായ ‘ജുഗൽബന്ദി’യിലൂടെ ആയിരുന്നു. ഇരു രാജ്യങ്ങളിലെയും സംഗീതജ്ഞരും നർത്തകരും ഒത്തുചേർന്ന ഒരു അതുല്യമായ ഇന്തോ-സ്‌കോട്ടിഷ് സാംസ്‌കാരിക സഹകരണമായിരുന്നു.

‘സുനോ ഗൗർ സേ ദുനിയാ വാലോം, ഭാഗ് മിൽഖ, ഏ വതൻ വതൻ, ലെഹാര ദോ’ എന്നിവയുൾപ്പെടെ ഭാരതത്തിലെ ഏറ്റവും അറിയപ്പെടുന്ന ചില ഗാനങ്ങളിലൂടെ സഞ്ചരിക്കുന്ന ഒരു കച്ചേരിക്കായി ശങ്കർ മഹാദേവൻ തന്റെ മക്കളായ സിദ്ധാർത്ഥിനും ശിവം മഹാദേവനുമൊപ്പം വേദിയിലെത്തി.

ഗുജറാത്തി പിന്നണി ഗായിക ഭൂമി ത്രിവേദി ആതിഥേയ സംസ്ഥാനത്തിന് ഒരു പ്രത്യേക അഞ്ജലി അർപ്പിച്ചു, നാല് വർഷത്തിനുള്ളിൽ കോമൺവെൽത്തിനെ സ്വാഗതം ചെയ്യുന്നതിനുമുമ്പ് ഗുജറാത്ത് കേന്ദ്ര വേദിയിൽ സ്ഥാനം നേടി.