ന്യൂ ദൽഹി: ജന്തർമന്ദറിൽ നീറ്റ്-യു.ജി. ഉൾപ്പെടെയുള്ള വിവിധ വിഷയങ്ങൾ ഉന്നയിച്ച് നടത്തിയ പ്രതിഷേധത്തിനിടെയുണ്ടായ അക്രമങ്ങളെയും അരക്ഷിതാവസ്ഥയെയും അഖില ഭാരതീയ വിദ്യാർത്ഥി പരിഷത്ത് അപലപിച്ചു. വിദ്യാർത്ഥികളുടെ നീതിയുക്തമായ സമരത്തിന്റെ മറവിൽ ചില രാഷ്ട്രീയ താൽപ്പര്യക്കാരും സമൂഹവിരുദ്ധ ശക്തികളും അക്രമവും അരാജകത്വവും അഴിച്ചുവിടാൻ ശ്രമിച്ചതായി എബിവിപി വാർത്താക്കുറിപ്പിൽ വ്യക്തമാക്കി.
പ്രതിഷേധത്തിനിടെ വിദ്യാർത്ഥികളെന്നവകാശപ്പെടുന്ന ചില അരാജകവാദികൾ നടത്തിയ അക്രമങ്ങളും തലസ്ഥാനത്തെ ക്രമസമാധാനനില തകരാനിടയായ സംഭവങ്ങളും അത്യന്തം ദുഃഖകരമാണ്.
ഇത്തരം സാഹചര്യങ്ങളിൽ പരിക്കേറ്റ വിദ്യാർത്ഥികൾക്കും സുരക്ഷാ ഉദ്യോഗസ്ഥർക്കും എബിവിപി ഐക്യദാർഢ്യം പ്രഖ്യാപിച്ചു. ഇത്തരം സംഘർഷങ്ങൾ ഭാവിയിൽ ആവർത്തിക്കില്ലെന്ന് പ്രതീക്ഷിക്കുന്നു. വിദ്യാർത്ഥികളുടെ പ്രശ്നങ്ങൾക്ക് അർത്ഥവത്തായ സംഭാഷണങ്ങളിലൂടെയും വ്യവസ്ഥാപിതമായ മാറ്റങ്ങളിലൂടെയുമാണ് പരിഹാരം കാണേണ്ടത്.
നീറ്റ്-യു.ജി. ഉൾപ്പെടെയുള്ള വിവിധ മത്സരപരീക്ഷകളിലെ ക്രമക്കേടുകൾക്കെതിരെ തുടക്കം മുതലേ എബിവിപി വിദ്യാർത്ഥി പക്ഷത്തോടൊപ്പമുണ്ട്. പരീക്ഷാ സമ്പ്രദായത്തിന്റെ വിശ്വാസ്യതയും സുതാര്യതയും ഉറപ്പുവരുത്താൻ കേന്ദ്ര ഏജൻസി അന്വേഷണം ആവശ്യപ്പെട്ടത് എബിവിപിയാണ്. നാഷണൽ ടെസ്റ്റിംഗ് ഏജൻസി (എൻ.ടി.എ.) ആസ്ഥാനത്തിന് മുന്നിൽ പ്രതിഷേധിക്കുകയും കുറ്റക്കാർക്കെതിരെ കർശന നടപടിയെടുക്കാൻ ആവശ്യപ്പെടുകയും ചെയ്തിരുന്നു. 2024 മുതൽ ഇന്നുവരെ വിദ്യാർത്ഥികളുടെ അവകാശങ്ങൾക്കായി എബിവിപി നിരന്തരം പോരാടുകയാണ്.
കേന്ദ്രസർക്കാരിനോട് ഉന്നയിക്കുന്ന പ്രധാന ആവശ്യങ്ങൾ
- ഉന്നതതല സമിതി രൂപീകരണം: മത്സരപരീക്ഷകളുടെ സുതാര്യതയും ആവശ്യമായ സ്ഥാപനപരമായ മാറ്റങ്ങളും പഠിക്കാൻ സർക്കാർ ഒരു ഉയർന്നതല സമിതിയെ നിയോഗിക്കണം.
- കൃത്യമായ സമയപരിധി: പരീക്ഷാ സമ്പ്രദായം കൂടുതൽ വിശ്വസനീയവും ഉത്തരവാദപരവുമാക്കാൻ ഈ സമിതി സമയബന്ധിതമായ നിർദ്ദേശങ്ങൾ സമർപ്പിക്കണം.
വിദ്യാർത്ഥികളുടെ സ്വാഭാവിക പ്രശ്നങ്ങളെ ചില സങ്കുചിത രാഷ്ട്രീയ താൽപ്പര്യങ്ങൾക്കോ രാജ്യവിരുദ്ധ അജണ്ടകൾക്കോ വേണ്ടി ഉപയോഗിക്കാൻ അനുവദിക്കില്ലെന്ന് എബിവിപി വ്യക്തമാക്കി. അത്തരം നീക്കങ്ങൾ ഭാരതത്തിൻ്റെ ആഭ്യന്തര സ്ഥിരതയും അഖണ്ഡതയും തകർക്കാൻ ശ്രമിക്കുന്ന ‘ഡീപ് സ്റ്റേറ്റ്’ പോലുള്ള രാജ്യവിരുദ്ധ ശക്തികൾക്കാണ് കരുത്ത് പകരുന്നത്.
രാജ്യത്തെ വിദ്യാർത്ഥി സമൂഹം ജനാധിപത്യ മൂല്യങ്ങളിൽ ഉറച്ചുനിൽക്കുന്നവരാണെന്ന് എബിവിപി ഓർമ്മിപ്പിച്ചു. വിദ്യാർത്ഥികളുടെ ന്യായമായ പ്രശ്നങ്ങളെ രാഷ്ട്രീയ പ്രലോഭനങ്ങളിൽ നിന്ന് അകറ്റിനിർത്തി സമാധാനപരമായ അന്തരീക്ഷം നിലനിർത്താൻ അദ്ധ്യാപകരും രക്ഷിതാക്കളുമടക്കം എല്ലാവരും ഒപ്പമുണ്ടാകണം.
നീറ്റ്-യു.ജി. ഉൾപ്പെടെയുള്ള പരീക്ഷകളിലെ ക്രമക്കേടുകൾ ലക്ഷക്കണക്കിന് വിദ്യാർത്ഥികളിൽ ആശങ്ക ഉണ്ടാക്കിയിട്ടുണ്ടെന്ന് എബിവിപി ദേശീയ ജനറൽ സെക്രട്ടറി ഡോ. വീരേന്ദ്ര സിംഗ് സോളങ്കി വ്യക്തമാക്കി. വിദ്യാർത്ഥികളുടെ ആവശ്യങ്ങളെ സങ്കുചിത രാഷ്ട്രീയ താൽപ്പര്യങ്ങളിലേക്ക് വഴിതിരിച്ചുവിടുന്നത് വിദ്യാർത്ഥി സമൂഹത്തോടുള്ള നീതികേടാണെന്നും അദ്ദേഹം കൂട്ടിച്ചേർത്തു.
