ദ്വാരക(ഗുജറാത്ത്): ഗോപാലകനും ഗോഭക്തനുമായ ദ്വാരകാപുരേശനെ കാണാന് തന്റെ 25 ഗോക്കളുമായി 450 കിലോമീറ്റര് നടന്ന് മഹാദേവ് ദേശായി എത്തി. ഗോക്കള്ക്ക് വേണ്ടി ദ്വാരകാപുരി ക്ഷേത്രത്തിന്റെ ശ്രീകോവില് നടന്ന അര്ധരാത്രി തുറന്നു. കണ്ണനെ കണ്ട്, കോവിലിന് പ്രദക്ഷിണം വച്ച് പ്രസാദം കഴിച്ച്, കുറിയണിഞ്ഞ് അവര് മടങ്ങി. നവംബര് 25നാണ് ദ്വാരകയില് അപൂര്വവും കൗതുകമുണര്ത്തുന്നതുമായ ക്ഷേത്രദര്ശനം നടന്നത്. നവംബര് 25നാണ് സംഭവം നടന്നത്.
കച്ഛ് ജില്ലയിലെ ഗോകര്ഷകനായ മഹാദേവ് ദേശായിയുടെ പ്രാര്ത്ഥനകളിലൊന്നാണ് അന്ന് സാക്ഷാത്കരിച്ചത്. ദ്വാരകാക്ഷേത്രത്തിന്റെ ചരിത്രത്തിലാദ്യമായാണ് അര്ധരാത്രിയില് നട തുറന്നത്. 23ന് രാത്രി കച്ഛില് നിന്ന് ഗോക്കളെയും കൂട്ടി മഹാദേവ് ദ്വാരകകയ്ക്ക് പുറപ്പെടുകയായിരുന്നു. കച്ഛിലെ ഗോകര്ഷകരെയാകെ ദുരിതത്തിലാഴ്ത്തിയ പശുക്കളുടെ രോഗബാധ മാറാന് വേണ്ടി മഹാദേവ് നേര്ച്ച നേര്ന്നതാണ്, ഗോക്കളെയും കൂട്ടി ഗോപാലകനെ കാണാം എന്നത്.
ലപി വൈറസ് ബാധ മൂലം നിരവധി പശുക്കളാണ് കച്ഛില് മരിച്ചത്. മഹാദേവിന്റെ പശുക്കള്ക്കും രോഗബാധയുണ്ടായി. അദ്ദേഹത്തിന്റെ ഗോശാലയിലെ തന്നെ 25 പശുക്കള്ക്ക് വൈറസ് ബാധിച്ചു. അവ സുഖം പ്രാപിച്ചാല്, ശ്രീകൃഷ്ണനെ കാണാന് കാല്നടയായി ദ്വാരകയില് വരുമെന്ന് മഹാദേവ് പ്രതിജ്ഞ ചെയ്തു. ‘ഭഗവാന് തുണച്ചു, ഗോക്കള് സുഖമായിരിക്കുന്നു. അവരെയും കൂട്ടി ഞാന് ദ്വാരകയിലെത്തിയത് ആ വാക്ക് പാലിക്കാനാണ്’, മഹാദേവ് പറഞ്ഞു.
പകല് നേരത്താണ് മഹാദേവും ഗോക്കളും ദ്വാരകയിലെത്തിയത്. എന്നാല് ആയിരങ്ങള് ദര്ശനം നടത്തുന്ന ആ സമയത്ത് ഗോക്കളെ ക്ഷേത്രത്തിനുള്ളില് പ്രവേശിപ്പിക്കാന് പറ്റില്ലെന്ന് അധികൃതര് വ്യക്തമാക്കി. മഹാദേവിന്റെ പ്രാര്ത്ഥനമാനിച്ച് ക്ഷേത്രസമിതി അടിയന്തര യോഗം ചേര്ന്ന് ആചാര്യന്മാരുടെ സമ്മതത്തോടെ ഗോക്കള്ക്കു വേണ്ടി രാത്രി 12 മണിക്ക് ശ്രീകോവില് തുറക്കാന് തീരുമാനിക്കുകയായിരുന്നു.
Discussion about this post