വന്ദേഭാരത് എക്‌സ്പ്രസിന്‍റെ സമയക്രമം പ്രഖ്യാപിച്ചു; വ്യാഴാഴ്ചകളില്‍ സര്‍വീസ് ഇല്ല

 തിരുവനന്തപുരം:  കേരളത്തിന് അനുവദിച്ച വന്ദേഭാരത് എക്‌സ്പ്രസിന്റെ സമയവിവര പട്ടിക പ്രഖ്യാപിച്ചു. തിരുവന ന്തപുരത്തു നിന്നും രാവിലെ 5.20ന് പുറപ്പെട്ട് ഉച്ചയ്ക്കു 1.25ന് കാസര്‍കോട്ട് എത്തും. തിരിച്ച് ഉച്ചയ്ക്കു 2.30ന് പുറപ്പെട്ടു രാത്രി 10.35ന് തിരുവനന്തപുരത്ത് എത്തും. 8 മണിക്കൂര്‍ 05 മിനിറ്റാണ് ഒരു ദിശയിലേക്ക് യാത്രയ്ക്ക് എടുക്കുന്ന സമയം.

വണ്ടിക്ക് ഷൊർണൂരിലും സ്റ്റോപ്പ് അനുവദിച്ചു. തിരുവനന്തപുരം, കൊല്ലം, കോട്ടയം, എറണാകുളം ടൗണ്‍, തൃശൂര്‍, ഷൊര്‍ണൂര്‍, കോഴിക്കോട്, കണ്ണൂര്‍, കാസര്‍ഗോഡ് എന്നിങ്ങനെയാണ് സ്‌റ്റോപ്പുകള്‍. വ്യാഴാഴ്ചകളില്‍ സര്‍വീസ് ഉണ്ടാകില്ല.  ചെങ്ങന്നൂരിലും തിരൂരിലും സ്റ്റോപ്പ് അനുവദിച്ചിട്ടില്ല.

തിരുവനന്തപുരം-കാസര്‍കോട് വന്ദേഭാരത് എത്തുന്ന  പുറപ്പെടുന്ന, ഓരോ സ്‌റ്റേഷനിലും എത്തുന്ന സമയം

തിരുവനന്തപുരം – 5.20,കൊല്ലം – 6.07,കോട്ടയം – 7.25, എറണാകുളം ടൗണ്‍ – 8.17, തൃശൂര്‍ – 9.22 ,ഷൊര്‍ണൂര്‍ – 10.02, കോഴിക്കോട് – 11.03,കണ്ണൂര്‍ – 12.03, കാസര്‍കോട് 1.25.

കാസര്‍കോട്-തിരുവനന്തപുരം വന്ദേഭാരത് പുറപ്പെടുന്ന, ഓരോ സ്‌റ്റേഷനിലും എത്തുന്ന സമയം

കാസര്‍കോട് -2.30, കണ്ണൂര്‍ -3.28, കോഴിക്കോട് – 4.28, ഷൊര്‍ണൂര്‍ – 5.28, തൃശൂര്‍ -6.03, എറണാകുളം -7.05,  കോട്ടയം -8.00, കൊല്ലം – 9.18, തിരുവനന്തപുരം – 10.35.

വന്ദേ ഭാരത് എക്സ്പ്രസ് യാത്ര ചെയ്യുമ്പോൾ ഒരു ട്രെയിനും പിടിച്ചിടില്ലെന്ന് ഇന്ത്യന്‍ റെയില്‍വേ പാസഞ്ചേഴ്‌സ് അമിനിറ്റീസ് കമ്മിറ്റി ചെയര്‍മാന്‍ പി.കെ. കൃഷ്ണദാസ്.  പറഞ്ഞു. സ്റ്റോപ്പുകൾ കൂടുതൽ വേണമെന്ന ആവശ്യം റെയിൽവേക്ക് മുന്നിലുണ്ട്. കേരളത്തിലെ ട്രെയിനുകളിൽ പഴയ ബോഗികൾക്ക് പകരം പുതിയ ബോഗികൾ വേണമെന്ന ആവശ്യം റെയിൽവേക്ക് മുന്നിലുണ്ടെന്നും അദ്ദേഹം പറഞ്ഞു.

 പ്രധാനമന്ത്രിയുടെ കേരള സന്ദർശനം പലരെയും അസ്വസ്ഥതപ്പെടുത്തുന്നുണ്ട്. ഇന്റലിജൻസ് റിപ്പോർട്ട് ചോർന്നതിൽ അന്വേഷണം വേണം. കേരളത്തിൽ സിപിഎമ്മിന് ബദൽ എൻഡിഎ ആണെന്ന് തെളിഞ്ഞു. പ്രധാനമന്ത്രി പറഞ്ഞ രാഷ്ട്രീയ മാറ്റം കേരളത്തിൽ ഉണ്ടാകുമെന്നും അദ്ദേഹം വ്യക്തമാക്കി.